ABŞ-ın Ermənistandakı səfirliyi bu ölkənin BMT Təhlükəsizlik Şurasının üzvü olan ölkələrə Qarabağda guya “humanitar böhran”la bağlı müzakirələrdən sonra qətnamə imzalamamaları üçün onlara təzyiq göstərməsi ilə bağlı məlumatı təkzib edib.

TEREF.AZ Cebhe.info-ya istinadla xəbər verir ki, ABŞ səfirliyi “Armenpress”-in sualına cavab olaraq bu mövzuya aydınlıq gətirib.

“ABŞ avqustun 16-da BMT Təhlükəsizlik Şurasının fövqəladə iclasından sonra Qarabağda humanitar vəziyyətlə bağlı qətnamə layihəsi təqdim etməyə hazırlaşırmı?” sualına səfirlikdən belə cavab verilib:

“Ötən çərşənbə günü ABŞ-ın BMT-dəki daimi nümayəndəsi, səfir Linda Tomas-Qrinfildin sədrliyi ilə BMT Təhlükəsizlik Şurasının Qarabağ məsələsi üzrə iclasında mövcud humanitar vəziyyətlə bağlı məsələlər müzakirə olunub.

Qətnamə layihəsini görməmişik və Birləşmiş Ştatların qətnaməni imzalamamaq üçün üzv dövlətlərə təzyiq göstərməsi ilə bağlı iddialar tamamilə yalandır.

BMT Təhlükəsizlik Şurasına verdiyimiz bəyanatda qeyd edildiyi kimi, Qarabağdakı humanitar vəziyyət bizi dərin narahat etməkdə davam edir”.