ABŞ BMT-nin qlobal yol təhlükəsizliyi kampaniyasına qoşulub.

“İki il davam edən reklam kampaniyası 2030-cu ilə qədər dünya üzrə yol-nəqliyyat hadisələri nəticəsində həlak olanların sayını iki dəfə azaltmağı hədəfləyir. Səy təhlükəsizlik kəmərləri və dəbilqə taxmaq və yolda telefondan istifadə etməmək kimi əsas və həyati əhəmiyyət kəsb edən vacib tədbirləri vurğulamaq məqsədi daşıyır”.

Bunu Birləşmiş Ştatlarda kampaniyanın başlanmasına həsr olunmuş mətbuat konfransında BMT-nin yol təhlükəsizliyi üzrə xüsusi nümayəndəsi Jan Todt deyib.

JCDecaux-nun Şimali Amerika prezidenti və baş icraçı direktoru Jan-Lük Deko bildirib ki, reklamlar bazar ertəsindən başlayaraq Nyu-York, Çikaqo və Boston da daxil olmaqla, 1000 şəhərdə və 80-dən çox ölkədə JCDecaux reklam lövhələrində görünəcək.

Onun sözlərinə görə, kampaniya medianın “maarifləndirməni, insanların həyatını xilas etməyi və beynəlxalq yol təhlükəsizliyi məsələsini necə təbliğ edə biləcəyini” nümayiş etdirir.

#MakeASsafetyStatement kampaniyası 2021-ci ildə başlayacaq Yol Təhlükəsizliyi üzrə BMT-nin yeni Fəaliyyət Onilliyinin bir hissəsidir.
BMT-nin məlumatına görə, hər il dünyada bir milyondan çox insan yol qəzalarında ölür, onların 90%-dən çoxu inkişaf etməkdə olan ölkələrdə baş verir.

Birləşmiş Millətlər Təşkilatının məlumatına görə, yol qəzaları ABŞ-da odlu silahdan sonra təsadüfi ölümlərin ikinci əsas səbəbidir. Bu ölümlərin çoxunun qarşısını almaq olar. ÜST hesab edir ki, ABŞ-da ölüm nisbəti Avropa ilə müqayisədə iki dəfə çoxdur.

2014-cü ildə Nyu-York şəhəri yollarda ölüm və ağır xəsarət alanların sayını azaltmaq üçün Vision Zero yol hərəkəti təhlükəsizliyi proqramına start verib. Şəhərin Beynəlxalq Əlaqələr üzrə komissarı Edvard Mermelşteynin sözlərinə görə, şəhər yüzlərlə mil uzunluğunda velosiped zolaqları inşa edib, avtomatlaşdırılmış sürət kameraları quraşdırıb və məktəb sürət zonaları yaradıb.

Onun sözlərinə görə, 2013-cü ildən 2023-cü ilə qədər yollarda təhlükənin qalmasına baxmayaraq, yol-nəqliyyat hadisələri nəticəsində ölənlərin sayı 12%, ölən piyadaların sayı isə 45% azalıb.

JCDecaux kampaniyası sentyabr ayında Brüsseldə başlayıb. O vaxtdan bəri Monqolustanda və Cənubi Afrikada reklamlar peyda olub.

Reklam kampaniyasında 14 dünya şöhrətli ulduz, o cümlədən BMT İnkişaf Proqramının xoşməramlı səfiri Mişel Yeoh, tennisçi Novak Cokovic və müğənni Kayli Minoq iştirak edir.