Azərbaycan Həmkarlar İttifaqları Konfederasiyasının (AHİK) sədri Səttar Möhbalıyevin Yeni Azərbaycan Partiyası ilə bağlılığı yoxdur. İndiyə kimi o, parlamentə bitərəf kimi deputat seçilib. Bu da normal bir haldır.

Bunu Teleqraf.com-a Yeni Azərbaycan Partiyasının İdarə Heyətinin üzvü Musa Quliyev Səttar Möhbalıyevin 3 saylı Babək-Kəngərli-Naxçıvan seçki dairəsi üzrə namizədliyini verməsinə münasibət bildirərkən deyib.

Musa Quliyev Həmkarlar İttifaqının sədrinin adətən bitərəf şəxs olduğunu bildirib: “Bəziləri yazır ki, YAP-ın siyahısında Səttar Möhbalıyevin adı yoxdur və s. Bu doğru deyil. O, heç vaxt YAP üzvü olmayıb. Həmkarlar İttifaqının sədri bitərəf adam olmalıdır ki, o siyasi baxışından asılı olmayaraq hər kəsin mövqeyini qoruya bilsin”.

Qeyd edək ki, Azərbaycan Həmkarlar İttifaqları Konfederasiyası (AHİK) sədri Səttar Möhbalıyev iyulun 26-da təşkilatın növbədənkənar qurultayının çağırılması barədə qərar verib.