Şənbə günü Avropanın böyük şəhərlərində və dünyanın müxtəlif yerlərində on minlərlə fələstinli tərəfdarı HƏMAS hücumlarının birinci ildönümündə atəşkəs çağırışı ilə küçələrə çıxıb.

Romada zorakılıq nümayiş etdirənləri dağıtmaq üçün polis gözyaşardıcı qaz və su şırnaqlarından istifadə edib. Avropanın bir neçə şəhərində böyük mitinqlər keçirilib, toplantıların həftə sonu davam edəcəyi və ildönümü günü olan bazar ertəsi zirvəyə çatacağı gözlənilir.

Romada bir neçə min nəfər şənbə günü günortadan sonra dinc nümayiş keçirib, daha kiçik qrup yerli hakimiyyət orqanlarının təhlükəsizliklə bağlı etirazlara icazə vermədiyiinə baxmayaraq, nümayişçilər şəhərin mərkəzinə doğru irəliləməyə cəhd edib. Qara geyinmiş və üzləri örtülü bəzi etirazçılar polisə daş, butulka və kağız bomba atıb, polis isə gözyaşardıcı qaz və su şırnaqları ilə cavab verib, nəticədə kütləni dağıtıb.

Yerli medianın məlumatına görə, toqquşmalarda azı 30 hüquq-mühafizə orqanı əməkdaşı və 3 nümayişçi yaralanıb. Romadakı mitinq daha əvvəl sakit keçib, insanlar “Azad Fələstin, Azad Livan” şüarları səsləndirib, fələstinlilərin bayraqlarını dalğalandırıb və münaqişənin dərhal dayandırılmasını tələb edən plakatlar qaldırıb.

Londonda minlərlə insan polisin sıx iştirakı ilə paytaxtdan keçərək Downing Street-ə yürüş edib. Fələstinlilərə tərəfdarlar və əllərində İsrail bayraqları olan əks-nümayişçilər bir-birinin yanından keçərkən atmosfer gərgin olub. Polis məmurlarının kordondan keçməyə çalışan fəalları geri itələməsi ilə qarşıdurma yaranıb. London Metropoliten Polisi bildirib ki, azı 17 nəfər ictimai asayişi pozmaqda, qadağan olunmuş təşkilata dəstək verməkdə və hücumda şübhəli bilinərək həbs edilib.

Almaniyanın şimal Hamburq şəhərində təxminən 950 nəfər fələstinlilərin və Livanın bayraqlarının dalğalanması və ya "Soyqırımı dayandırın" şüarları ilə dinc nümayiş keçirib. İsrail tərəfdarı iki kiçik əks-nümayişin insidentsiz keçdiyi bildirilir.

Bir neçə min etirazçı Fələstin və Livan xalqları ilə həmrəylik nümayişi ilə Parisin Republique Plaza meydanında dinc şəkildə toplaşıb. Bir çoxları əllərində “soyqırımı dayandırın”, “azad Fələstin” və “əlləri Livandan çəkin” yazılan plakatlar tutaraq fələstinlilərin bayraqlarını dalğalandırıb.

Fələstinlilərin tərəfdarları da Nyu-Yorkun Tayms Meydanına toplaşaraq atəşkəsə çağırıb, “Qəzza!” şüarları səsləndirib. Bəziləri keffiyə şərfləri taxıb, fələstinlilərin və Livanın bayraqlarını dalğalandırıb və üzlərində qanı simvolizə edən qırmızı boya ilə İsrailin Baş naziri Binyamin Netanyahunun böyük karton şəklini tutub.

Danimarka, İsveçrə, Cənubi Afrika, Hindistan və ABŞ-ın bir sıra şəhərlərində, eləcə də dünyanın digər yerlərində mitinqlər planlaşdırılıb.

Filippində onlarla solçu fəal ABŞ-ın Maniladakı səfirliyi yaxınlığında etiraz aksiyası keçirib, polis onların dənizkənarı kompleksə yaxınlaşmasına mane olub.

İndoneziyanın paytaxtı Cakartada minlərlə fələstinli tərəfdarı bazar günü güclü mühafizə olunan ABŞ səfirliyinə doğru yürüş edib. Səlahiyyətlilər səfirliyə aparan yolları ülgüc məftilləri və beton maneələrlə bağlayıb, binanın ətrafına 1000-dən çox polis yerləşdirilib.