Baş avropalı diplomat vurğulayıb ki, Aİ-nin rolu yalnız Kiyevə hərbi yardım göstərməkdir.
Ukrayna ərazisində Rusiya və Avropa qoşunları arasında toqquşma "gözlənilmir".
Aİ diplomatiyasının rəhbəri Josep Borrell bu barədə Brüsseldə Avropa İttifaqı ölkələrinin Müdafiə Nazirliyi rəhbərlərinin görüşündən sonra keçirilən mətbuat konfransında bildirib. Onun sözlərini "RİA Novosti" sitat gətirib:
"Biz döyüşən tərəf deyilik, biz münaqişədə iştirak etmirik. Ukrayna ərazisində Avropa qoşunu yoxdur və onların döyüş meydanında Rusiya qüvvələri ilə toqquşması gözlənilmir".

O vurğulayıb ki, Aİ-nin rolu müstəsna olaraq Kiyevə hərbi yardım göstərməkdir.
Moskva isə Ukraynaya silah tədarükünü münaqişənin həllini çətinləşdirən amil kimi qiymətləndirir. Rusiyanın xarici işlər naziri Sergey Lavrovun sözlərinə görə, bu cür hərəkətlər NATO ölkələrini münaqişəyə cəlb edir və Ukrayna üçün nəzərdə tutulan hərbi yükləri qanuni hədəfə çevirir.
Lavrov, həmçinin qeyd edib ki, ABŞ və NATO münaqişəyə təkcə silah tədarükü ilə deyil, həm də Ukrayna hərbçilərinin Böyük Britaniya, Almaniya, İtaliya və digər ölkələrdə təlim keçməsi ilə cəlb olunub.
Rusiya prezidentinin mətbuat katibi Dmitri Peskov əvvəllər qeyd edib ki, Qərbin silah tədarükü danışıqlara kömək etmir və vəziyyəti daha da pisləşdirir. Onun sözlərinə görə, Rusiya hərbçiləri əmindirlər ki, Ukrayna Silahlı Qüvvələrinə verilən Qərb tankları döyüş meydanında digər texnikalar kimi məhv ediləcək.