ABŞ Dövlət katibi Marko Rubio Rusiyanın yeni genişmiqyaslı hücuma hazırlaşdığı ilə bağlı şayiələrdən danışıb.

“AzPolitika” xarici KİV-ə istinadla xəbər verir ki, Dövlət katibi Rusiyanın gözlənilən hücumunu Moskvanın sülh istəməməsinin göstəricisi kimi qəbul edəcəklərini deyib: "Əgər sabah yuxudan oyanıb rusların hansısa hücum əməliyyatına başladığını görsək, onların sülh istəyib-istəmədiyini dəqiq biləcəyik. Əgər istəməsələr, biz bunu əvvəlcədən bilməliyik ki, siyasətimizi buna uyğunlaşdıraq".

O, atəşkəs rejiminin pozulmasının “narahatedici əlamət” olduğunu vurğulayıb: "Müharibə davam edir və indi həm Ukraynada, həm də Rusiyada nəsə partlayacaq, çünki münaqişə hələ də qızğın çağındadır. Biz isə onun sona çatması üçün çalışırıq. Əgər real atəşkəs olsaydı, hərbi əməliyyatlar tam dayandırılsaydı, heç bir partlayış baş verməzdi. Lakin, gördüyümüz kimi, ruslar buna razı olmadılar, onların öz şərtləri var və onlar razılaşmalara əməl etmirlər”.