Avropa Komissiyası (AK) ABŞ-nin Avropa İttifaqı (Aİ) da daxil olmaqla polad idxalına rüsumları 25 %-dən 50 %-ə qədər artırmaq qərarından dərin təəssüflənir.
Bakupost.az Report-a istinadla xəbər verir ki, bu barədə AK-ın mətbuat xidmətinin bəyanatında bildirilir.
Qurum hesab edir ki, bu qərar qlobal qeyri-müəyyənliyi artıracaq və ticarət müharibəsindən qaçmaq üçün Aİ ilə danışıqlara xələl gətirəcək.
"AK ABŞ-nin polad rüsumlarının 25 %-dən 50 %-ə qədər artırılması ilə bağlı elan edilmiş qərarından dərin təəssüf hissi keçirir. Bu qərar qlobal iqtisadiyyatda qeyri-müəyyənliyi artırır və Atlantik okeanının hər iki tərəfindəki istehlakçılar və biznes üçün xərcləri artırır. Bu həmçinin Aİ-nin danışıqlar yolu ilə həllə nail olmaq üçün davam edən səylərini sarsıdır", – məlumatda qeyd olunub.
Bundan əvvəl ABŞ Prezidenti Donald Tramp "Truth" sosial şəbəkəsində ABŞ-dən polad və alüminium idxalına tətbiq edilən 50 %-lik rüsumların iyunun 4-dən qüvvəyə minəcəyini açıqlamışdı.