İran alimləri və IT mütəxəssisləri İsrailin hava hücumundan müdafiə sistemini sındırmağa nail olublar və indi İranın ballistik və hipersəs raketləri hədəfləri vura bilir.

Oxu.Az xəbər verir ki, bu barədə Belarusun STV telekanalına müsahibəsində İranın Minskdəki səfiri Əlirza Sanei bildirib.

"Alimlərimiz, İT mütəxəssislərimiz İsrailin hava hücumundan müdafiə sistemini sındırmağı bacarıblar. Bilirsiniz ki, onların hava hücumundan müdafiə sistemi bir neçə təbəqədən ibarətdir. Bura "Dəmir günbəz" və ABŞ-nin təmin etdiyi qoruma daxildir. Amma bütün bu təbəqələrə baxmayaraq, raketlərimizin əksəriyyəti onların hədəflərini vurur", - o qeyd edib.

Bundan əvvəl İslam İnqilabı Keşikçiləri Korpusu (SEPAH) İsrailə növbəti raket zərbələri dalğası zamanı yeni üsuldan istifadə etdiyini bildirmişdi. Nəticədə İsrailin hava hücumundan müdafiə sistemləri bir-birinə hücum edib.