İrəvan Şəhər Şurasına keçirilən seçkidə Çiçəklənən Ermənistan Partiyası qalib gələcək.

Axar.az xəbər verir ki, bu nəticə Rusiyanın ROSA fondunun keçirdiyi sorğudan sonra ortaya çıxıb. Sorğu iştirakçılarının 54%-i seçkidə iştirak edəcəyini, 34%-i isə seçkiyə getməyəcəyini bildirib. 37% şəxs Çiçəklənən Ermənistan Partiyasına, 22% İslahatçılar Partiyasına, 18% hökumətin dəstəklədiyi Mənim Addımım Blokuna, 11% İrəvanlılar Blokuna səs verəcəyini bildirib. Seçkidə iştirak edən digər birliklərə ümumilikdə 12% səs veriləcəyi müəyyən edilib.

Qeyd edək ki, Çiçəklənən Ermənistan Partiyasını dolayısı yolla iş adamı Qagik Çarukyan maliyyələşdirir. Sentyabrın 16-dan etibarən partiya ilə hökumət arasında münasibətlər gərginləşib. Partiya hökuməti təzyiqlərdə və Serj Sərkisyanın adamlarına dəstək verməkdə ittiham edib.

Çiçəklənən Ermənistan Partiyasının Robert Köçəryanla sıx əlaqələrə malik olduğu iddia edilir.

İslahatçılar Partiyasına isə Vaqan Babayan rəhbərlik edir. Babayan əvvəllər Çiçəklənən Ermənistan Partiyasının üzvü olub və bunun sayəsində deputat seçilib. 2016-cı ildə partiyadan ayrılan Babayan İslahatçılar Partiyasını yaradıb. Sonuncu parlament seçkisində Babayan hakim Respublikaçılar Partiyası ilə birgə seçkiyə qatılıb.