Müşahidələr göstərir ki, xüsusi karantin rejimində istehlakçılar daha çox internet işlədir. Bununla bağlı resurslarda çatışmazlıqlar var. Yəni trafik çoxalıb, insanlar daha çox internet istehlak edirlər.

Bu fikirləri Teleqraf.com-a Azərbaycan İnternet Forumunun prezidenti Osman Gündüz internetin sürətinin aşağı olması səbəbləri haqda danışarkən deyib.

Osman Gündüz xatırladıb ki, əvəllər dövlət məmurları iş yerində işləyirdisə, bu dövlət interneti idi: “O cümlədən özəl şirkətlərdə çalışan insanlar iş yerlərində internetdən istifadə edirdilər. İndi məmurlar, özəl şirkət əməkdaşları evlərində internetdən istifadə edirlər”.

Mütəxəssisin sözlərinə görə, internet istehlakçılarının provayderlə müqaviləsi var: “İstehlakçılar bəlli miqdarda ödəniş edir ki, konkret həcmdə internetlə təmin olunsun. Provayder müqavilənin şərlərində göstərilən sürəti təmin etməyə borludurlar. Əgər çatdırmırsa, deməli, istehlakçının hüquqları pozulur”.