"Səba"dan şikayət: "Maaşlar verilmir, iş vaxtı 8 saatdan çoxdur"
21-01-2021, 19:58
Şabran sakinləri “Səba Broyler”dən “MediaPost”a şikayət ünvanlayıb.
Firmanın Şabranakı müəssisəsində çalışan şəxslər maaşların verilməməsindən gileyləniblər. İşçilər həmçinin iş vaxtının 8 saatdan çox olmasından, işçilərin istismar edilməsindən narazılıqlarını ifadə ediblər.
Şikayətlə əlaqədar “Səba” broylerdən “MediaPost”un sorğusuna cavab olaraq bildirilib ki, iş saatının çox olması ilə bağlı deyilənlər həqiqəti əks etdirmir:
“Rəsmi şəkildə hər bir iş yerinin iş saatı var”.
Firma təmsilçisi qeyd edib ki, maaşların gecikməsi ilə bağlı deyilənlər qarayaxma ola bilər:
“Şabranda müəssisədə o qədər də adam çalışmır. Müəssisədə demək olar ki, qablaşdırma sahəsində bir neçə işçi var. Qalanı podratçılardır. Onlarla müqavilə əsasında işləyirik. Başa düşə bilmirəm ki, bu şikayət haradandır? Bizim Şabranda 2000-3000 işçimiz yoxdur ki, şikayət eləsin. Bu baxımdan şikayət qarayaxma xarakterli ola bilər”.
"SƏBA" Açıq Səhmdar Cəmiyyətindən həmçinin qeyd edilib ki, maaşların gecikməsi ilə bağlı deyilənlər araşdırıldıqdan sonra cavab veriləcək.
