Bir müddət əvvəl pərakəndə satışda 50-60 qəpiyə təklif olunan limonun indi 1 manatdan başlayaraq 1 manat 50 qəpiyə qədər qiymət aralığında satılır.
Hətta kiloqramla satışda da artım müşahidə olunub. Əvvəllər 2 manat 50 qəpik və ya 3 manata təklif edilən limon hazırda daha yüksək qiymətlərlə alıcılara təqdim olunur.

Bəs Azərbaycan limonu əsasən hansı ölkələrdən alır?

TEREF Valyuta.az-a istinadən xəbər verir ki, 2025-ci ilin yanvar-may aylarında Azərbaycana ümumilikdə 7 min 595 ton limon və laym idxal olunub. Bu məhsulların idxalı üçün 5 milyon 867 min ABŞ dolları xərclənib.

Limonlar əsasən beş ölkədən – Türkiyə, İran, Cənubi Afrika Respublikası, Çin və Braziliyadan gətirilib.

Ən çox idxal Türkiyədən olunub. Bu ölkədən 7 min 139 ton limon və laym alınıb. İdxal üçün ödənilən məbləğ 5 milyon 355 min dollar təşkil edib. Türkiyədən gətirilən limonun 1 kiloqramı orta hesabla 0.75 dollar, yəni 1 manat 27 qəpik olub.

İran İslam Respublikasından 182 ton məhsul idxal olunub və bunun üçün 136 min dollar ödənilib. Buradan gətirilən limonların 1 kiloqramı da 0.75 dollar, yəni 1 manat 27 qəpik olub.

Cənubi Afrika Respublikasından 163 ton limon alınıb. İdxal dəyəri 204 min dollar təşkil edib. Bu ölkədən gətirilən məhsulun kiloqramı 1,25 dollara, yəni 2 manat 12 qəpiyə başa gəlib.

Çindən idxal edilən 84 ton limon üçün 117 min dollar ödənilib.1 kiloqram məhsulun qiyməti isə 1,39 dollar və ya 2 manat 37 qəpik olub.

Ən az idxal Braziliyadan həyata keçirilib. Bu ölkədən 26 ton limon gətirilib və 53 min dollar xərclənib. Braziliya limonu digərlərinə nisbətən daha baha başa gəlib – 1 kiloqram üçün 2 dollar 6 sent, yəni 3 manat 49 qəpik.