Dünən qəribə bir hadisə baş verdi. evisa.gov.az portalının verdiyi məlumata görə, 30 avqust 2017-ci ildən etibarən təcili e-viza üçün dövlət rüsumu 70 ABŞ dolları müəyyən edilmişdi. Xəbəri saytımızda yenicə paylaşmışdıq ki, dövlət rüsumunun miqdarı dəyişdirildi. Yeni dəyişikliyə əsasən, rüsum 50 dollara endirildi.
Qeyd edək ki, mövcud qaydalara görə, əcnəbi və ya vətəndaşlığı olmayan şəxs Azərbaycan Respublikasına səfər etmək üçün elektron vizanın sürətləndirilmiş qaydada alınması ilə bağlı müraciət etdikdə, belə müraciətlərə “ASAN Viza” sistemi vasitəsilə 3 saat ərzində baxılması təmin olunacaq.

Mütəxəssislər qiymətlərin təcili endirilməsinin səbəbini ölkədə turizmi inkişaf etdirmək niyyətilə əsaslandırırlar. Xüsusilə Qurban bayramı ərəfəsində bu addımın atılması da təsadüfi deyil; İranda və Türkiyədə yaşayan və bayramı Azərbaycanda keçirmək istəyən soydaşlarımızın ziyarətlərini asanlaşdırmaq nəzərdə tutulur./ovqat.com