Qəhvə təkcə gündəlik enerji mənbəyi deyil, həm də dünyanın bir çox guşəsində mədəniyyətin və zövqün simvolu hesab olunur. Lakin bəzi qəhvələr var ki, onların qiyməti adi bir fincan qəhvənin dəyərini qat-qat üstələyir. Bu bahalılıq isə təsadüfi deyil, nadirlik, yetişdiyi mühit, emal prosesi və məhdud istehsal onları xüsusi edir.

Dünyanın ən bahalı 5 qəhvəsini təqdim edirik.

1. Kopi Luwak (Sivet Qəhvəsi)

Kopi Luwak əsasən Cənub-Şərqi Asiyada istehsal olunur. Bu qəhvənin fərqi onun hazırlanma üsulundadır: qəhvə giləmeyvələri əvvəlcə Asiya palmalı siveti adlı heyvan tərəfindən yeyilir və qismən həzm olunur. Heyvanın mədə fermentləri dənələrin tərkibini dəyişdirərək acılığı azaldır və daha yumşaq, torpaqvari dad yaradır.

Daha sonra həmin dənələr toplanır, təmizlənir və qovrulur. Sivetlərin düzgün qidalanması bu qəhvənin keyfiyyətinə birbaşa təsir göstərir. Lakin illərdir bu istehsal üsulu ilə bağlı heyvanların saxlanma şəraiti mövzusu etik mübahisələrə səbəb olur. Bu qəhvənin qiyməti 50–100 dollar/pound olsa da, vəhşi şəraitdə toplananları 600 dollardan yuxarı qiymətə satılır.

2. Black Ivory Coffee (Qara Fildişi Qəhvəsi)

Taylandda istehsal olunan bu qəhvə də oxşar üsulla hazırlanır, sadəcə burada prosesdə sivet deyil, fillər iştirak edir. Qəhvə giləmeyvələri fillərin həzm sistemindən keçir, mədə şirələri isə dənələrdəki acılığa səbəb olan zülalları parçalayır.

Nəticədə ortaya qoz, giləmeyvə və şokolad notlarını özündə birləşdirən, olduqca yumşaq dad çıxır. Məhsuldarlığın son dərəcə az olması və illik istehsalın məhdudluğu bu qəhvəni dünyanın ən bahalıları sırasına daxil edir. Fildişi qəhvəsinin qiyməti təxminən 500 dollar/pound səviyyəsindədir, bəzi hallarda isə 2,000–2,500 dollara qədər qalxır.

3. St. Helena Coffee

Atlantik okeanında yerləşən Müqəddəs Yelena adasında yetişdirilən bu qəhvə həm nadirliyi, həm də dad xüsusiyyətləri ilə seçilir. Ada vulkanik torpağa və təmiz iqlimə malikdir, bu isə qəhvəyə meyvə, çiçək və sitrus notlarının qarışığını bəxş edir.

İstehsal həcminin az olması və uzaq ada şəraitində daşınma çətinliyi səbəbindən bu qəhvə bazarda yüksək qiymətlə satılır. Bu nadir qəhvə 80–225 dollar/pound aralığında qiymətləndirilir.

4. Hacienda La Esmeralda

Panamada yetişdirilən bu qəhvə qlobal hərraclarda ən yüksək qiymətə satılan sortlardan biridir. Dənələr guava ağaclarının kölgəsində böyüyür, bu isə ona yasəməni xatırladan xüsusi aroma verir.

Kiçik partiyalarda istehsal olunduğu üçün hər il çox məhdud miqdarda satışa çıxarılır. Bu səbəbdən qəhvə bilicilərinin ən çox axtardığı məhsullardan biridir. Panamada istehsal olunan bu qəhvənin bazar qiyməti 100–130 dollar/pound civarındadır, lakin hərraclarda 10,000 dollardan çox dəyərlə satıldığı hallar olub.

5. Jamaican Blue Mountain Coffee

Yamaykanın Mavi Dağlarında yetişdirilən bu qəhvə dünyada ən məşhur sortlardan hesab olunur. Yumşaq dadı, az acılığı və zəngin aroması ilə seçilir. Dənələr diqqətlə əl ilə yığılır və xüsusi üsulla emal olunur.

Yüksək keyfiyyəti və məhdud istehsalı səbəbindən qiyməti çox bahadır. Hətta bazarlarda saxta məhsulların satılması halları da müşahidə olunur. Orijinal “Blue Mountain” isə həm keyfiyyət, həm də nüfuz baxımından qəhvə dünyasının ən bahalı içkilərindən biridir. Yamayka qəhvəsinin qiyməti əsasən 140 dollar/pound səviyyəsindədir.

Niyə bu qəhvələr bahalıdır?

Bu qəhvələrin yüksək qiymətinə bir neçə amil təsir edir:

Əl əməyinə əsaslanan yığım və emal prosesi

Yetişdiyi iqlim və torpağın unikal olması

Heyvanların həzm fermentləri ilə emal olunması (Kopi Luwak və Black Ivory)

Məhdud istehsal həcmi