Xalq artisti Gülyaz Məmmədova mətbuatda onun Məhəmməd Əmin Rəsulzadə haqqında səsləndirdiyi ifadələrin doğru, obyektiv şəkildə yayımlanmadığını qeyd edib.
Bununla bağlı Gununsesi.info-ya açıqlama verən xalq artisti Gülyaz Məmmədova bildirib ki, ölkə.az saytında guya onun Məhəmməd Əmin Rəsulzadə haqqında sualdan yayınması ilə bağlı gedən fikirlər həqiqəti əks etdirmir:
“Mən o zaman avtomobil idarə etdiyimdən jurnalistin sualını cavablandırmağı məqbul saymadım. Məhəmməd Əmin Rəsulzadəyə gəldikdə isə o, AXC qurucularından və liderlərindən biridir. Ona görə də Rəsulzadəyə hər bir azərbaycanlı kimi mənim də böyük hörmətim var”.
Xalq artisti əlavə edib ki, Azərbaycan prezidenti İlham Əliyev Azərbaycan Xalq Cümhuriyyətinin 100 illiyinin qeyd olunması ilə bağlı sərəncam imzalayıb və bu sərəncamdan irəli gələrək ölkədə bir sıra tədbirlər həyata keçiriləcək: “Bu tədbirlər çərçivəsində Rəsulzadə ilə bağlı hər hansı musiqi və ya mahnı bəstələnərsə, bizə də onu ifa etmək təklif olunarsa, böyük məmnuniyyətlə həmin musiqini ifa etməyə hazıram”.
Qeyd edək ki, xalq artisti ölkə.az-ın əməkdaşının “Məhəmməd Əmin Rəsulzadə barədə əsər təqdim edilsə, oxuyarsınızmı?” sualına belə cavab verib: “Yoldayam, sualınıza cavab verə bilməyəcəyəm. Çünki fikrim yayınır”. Gülyaz Məmmədova eyni zamanda deyib ki, ona Məhəmməd Əmin Rəsulzadə ilə bağlı heç bir bəstəkar tərəfindən əsər təqdim edilməyib.