"Türkiyə PUA istehsalında dünyanın ən yaxşı 3-4 ölkəsindən biridir. Bu təcrübə və imkanlarımızı NATO müttəfiqimiz Polşa ilə bölüşməkdən məmnunuq.Biz Polşaya PUA ixrac edəcəyik. Az öncə imzalanan müqavilə ilə Türkiyə tarixində ilk dəfə bir NATO və Avropa Birliyi ölkəsinə PUA ixrac edəcək. Bu sahədə əməkdaşlığımızı gələcəkdə də artıracağımıza inanıram."

Avropa.info xəbər verir ki, bunu Türkiyə prezidenti Rəcəb Tayyib Ərdoğan Polşa prezidenti Duda ilə birgə keçirdiyi mətbuat konfransında deyib. Ərdoğan, Polaşaya "Bayraktar TB2" PUA-ları satdıqlarını bildirib.

"Biz hər zaman Polşanın Türkiyəyə dəstəyini hiss etmişik. Polşanın NATO-nun Türkiyəyə xüsusi təhlükəsizlik tədbirləri çərçivəsində İncirlik Bazamıza dəniz patrul təyyarəsi və hərbi missiya göndərməsini alqışlayırıq. F-16 təyyarəmizi tezliklə Polşaya göndərəcəyik", deyə Ərdoğan qeyd edib.

Qeyd edək ki, Türkiyə ilə Polşa arasında 6 müqavilə imzalanıb. Bunlardan biri "Bayraktar TB2" PUA-larının Polşaya satışı ilə bağlıdır.