İsveçin və Finlandiyanın NATO-ya üzvlüyünə mane olan Türkiyə prezidenti Rəcəb Tayyib Ərdoğan hər iki ölkənin liderləri ilə telefon danışığı aparıb və onun fikrini dəyişə biləcək şərtlərini açıqlayıb.

Bu barədə Editor.az “Reuters”ə istinadən xəbər verir. Belə ki, Türkiyə dövlətinin başçısı İsveçi terror təşkilatlarına münasibətinə yenidən baxmağın və Türkiyənin 2019-cu ildə Suriyaya müdaxiləsindən sonra ona qarşı tətbiq edilən silah embarqosunun ləğvinin vacibliyini vurğulayıb. Yalnız bundan sonra o, isveçlilərin NATO-ya daxil olması ilə bağlı fikirlərini yenidən nəzərdən keçirməyə hazırdır.

İsveçin baş naziri Maqdalena Andersson bu çağırışı yüksək qiymətləndirdiyini və Türkiyə ilə ikitərəfli əlaqələrin gücləndirilməsinə ümid etdiklərini bildirib. Finlandiya prezidenti Sauli Niinisto söhbətində isə Ərdoğan “NATO müttəfiqi üçün təhlükə yaradan terror təşkilatlarına qarşı mübarizənin olmaması alyansın ruhuna uyğun gəlmir” deyib. Finlandiya lideri “açıq və birbaşa” söhbətə görə təşəkkür edib və bu mövzuda dialoqu davam etdirməyə razılaşıb. Daha sonra Ərdoğan NATO-nun baş katibi Stoltenberqə zəng edib, onunla Finlandiya və İsveçin NATO-ya üzv olmaq müraciətlərini müzakirə edib və bildirib ki, “hər iki ölkə Türkiyə ilə açıq həmrəylik nümayiş etdirməyənə qədər” Şimali Atlantika Alyansına qoşulmaq üçün onların müraciətlərini dəstəkləməyəcək.