Türkiyənin Balıkesir və Bursa şəhərlərində mütəşəkkil cinayət qruplara qarşı “Mahzen-31” əməliyyatı keçirilib.

Bu barədə Türkiyə daxili işlər naziri Ali Yerlikaya özünün “X” hesabında məlumat verib.

Məlumata görə, əməliyyat zamanı İsmayıl Yavuz adlı şəxsin başçılıq etdiyi mütəşəkkil cinayət qrupu zərərsizləşdirilib. Qrup rəhbəri də daxil olmaqla, cinayətkar qrupun üzvü olan səkkiz şübhəli saxlanılıb.

Qrup üzvlərinin narkotik və ya stimullaşdırıcı maddələrin istehsalı və ticarəti, insanı azadlığından məhrum etmə, talançılıq və oğurluq, silahla təhdid və hücum, işgəncə vermə və digər bu qəbildən cinayətlər törətdiyi məlum olub.

Əməliyyat nəticəsində ov tüfəngləri, müxtəlif miqdarda narkotik vasitə və cinayətdə istifadə olunduğu müəyyən edilən çox sayda cib telefonu ələ keçirilib.