ABŞ-ın Suriyadakı terror təşkilatı PYD/PKK-ya İŞİD-lə mübarizə səbəbi ilə hərbi yardımları davam edir. Son 10 gündə ümumilikdə 130 yük maşını Rəqqanın şimalındakı təşkilat üzvlərinə göndərilib.

FaktXəbər-in "Anadolu" agentliyinə istinadən verdiyi məlumata görə, bu gün səhər saatlarında zirehli maşınların müşayiəti ilə sursat daşıyan 50 yük avtomobili İraq sərhədindən keçərək, təşkilat nəzarətindəki Hasekeyə daxil olub.

Bundan başqa, iyunun 5-də 60, iyunun 12-də 20 yük avtomobili PYD/PKK bölgəsinə çatdırılıb.

ABŞ-ın PYD/PKK terror təşkilatını silahlandırma siyasətini prezident Donald Tramp rəsmi fərmanla təsdiqlədikdən sonra - 15 maydan etibarən 7 dəfəyə ümumilikdə 348 yük maşını hərbi yardım çatdırılıb.

ABŞ Müdafiə Nazirliyi (Pentaqon) tərəfindən yayımlanan rəsmi sənəddə Suriyadakı PYD/PKK dəstələrinə veriləcək silahlar siyahısında 12 min ədəd "Kalaşnikov" markalı avtomat, 6 min ədəd pulemyot və 3 min 500 ədəd iri çaplı pulemyot var. Bundan əlavə, siyahıda 3 min ədəd Amerika istehsalı olan RPG-7 və 1000 ədəd Amerika istehsalı olan AT-4 və Rusiya istehsalı olan SPG-9 tank əleyhinə qumbaraatan da yer alıb. Eyni zamanda müxtəlif kalibrə malik 235 ədəd qaubitsa, 100 ədəd snayper tüfəngi, 450 ədəd PV-7 tipli gecəgörmə cihazı və 150 ədəd infraqırmızı lazer aydınlaşdırıcı cihazın terror təşkilatına veriləcəyi bildirilir.