Büstün yerləşdiyi Mütəfəkkirlər Parkında çoxsaylı heykəl var. Onların böyük əksəriyyəti betondandır. Heykəlin hansı materialdan olması heç nəyin göstəricisi deyil. Dünyadakı ən dəyərli sənət əsərləri adi kətanın üzərində yaradılıb. Amma sözügedən büstün digərlərindən fərqlənməsi üçün onu polyesterdən hazırladıq.

Bu sözləri Kult.az-a açıqlamasında heykəltəraş Kamran Əsədov xaricdə yaşayan azərbaycanlı jurnalistlərdən birinin V.Səmədoğlunun büstünün “sintetik karton”dan olması və 458 manata başa gəlməsi haqda yaydığı məlumata münasibətində deyib. K.Əsədov bildirib ki, Vaqif Səmədoğlunun şərəfinə hazırladığı bu büst üçün material heykəltaraşlıqda istifadə edilən ən müasir materiallardandır:

“Sözügedən büstün sifarişini aprel ayında almışam. İyun ayında Qazax şəhərində açılışı olub. Büstün hündürlüyü 120, eni 0,80 sm-dir”.

Heykəltəraş bildirib ki, büstün hazırlanması ilə bağlı “dəqiqliklə” göstərilən 458 manat məbləğ sadəcə gülməlidir.

“458 manata qara karandaşla adi kağız üzərində adamın heç portretini çəkmirlər”, - deyə müsahibimiz bildirib. Buna baxmayaraq, heykəltəraş bu işə görə aldığı qonorardan danışmayıb:

“Xalq şairinin büstünə görə alınan qonorardan danışmaq ayıbdır. Belə abidələrin dəyəri incəsənət əsəri olmasındadır və yalnız bu müzakirə edilə bilər”.

Qeyd edək ki, xaricdə yaşayan jurnalist Qənimət Zahid Qazaxda Azərbaycanın xalq şairi Vaqif Səmədoğlunun şərəfinə qoyulan büstün fotosuna yayaraq, onun guya “sintetik karton”dan hazırlandığını, 458 manata başa gəldiyini, ancaq 40 min manata sənədləşdirildiyini iddia edib.