Ümumdünya Səhiyyə Təşkilatının REACT-C19 layihəsi çərçivəsində Azərbaycana gələn həkimlər artıq 3 gündür ki, rayon xəstəxalarında fəaliyyət göstərirlər.

Yenisabah.az xəbər verir ki, Türkiyədə təhsil alan, yaşayan və işləyən azərbaycanlı həkimlər 14 gün Bakıdakı xəstəxanalarda fəaliyyət göstərdikdən sonra rayonlara üz tutublar.

Hazırda Goranboy, Gəncə, Şəmkir və Ağdaşda 4 həkim qrupu var. Onların hər biri olduqları bölgədə 14 gün fəaliyyət göstərəcəklər.

Sözügedən layihə çərçivəsində Goranboyda fəaliyyət göstərən həkim Cəbrayıl Cəbrayılov deyir ki, Azərbaycanda koronavirus müalicəsi dünyanın bir çox ölkəsindən yaxşı aparılır.

Onun sözlərinə görə, koronavirusu birdəfəlik məğlub etmək vətəndaşların karantin rejimi qaydalarına əməl etmələrindən asılıdır. Xüsusilə də sosial məsafə, şəxsi gigiyena və fərdi məsuliyyət bu məsələdə həlledici rol oynayır.