“Hərbçilərin maaş problemi Samir Şərifovdan qaynaqlanırdı” – Sabotaj

3-03-2021, 19:41           
 “Hərbçilərin maaş problemi Samir Şərifovdan qaynaqlanırdı” – Sabotaj
Hərbçilərin maaş problemi həllini tapdı. Müdafiə nazirinin müvafiq əmrinə əsasən hərbi qulluqçuların vəzifə maaşlarına müddətli əlavələr müəyyən edilib. Bu barədə Nazirliyin Mətbuat Xidmətindən bildirilib. Əmrə əsasən, Azərbaycan Ordusunun Ermənistanla dövlət sərhədində və Azərbaycanın Qarabağ bölgəsində Rusiya Federasiyası sülhməramlı kontingentinin yerləşdirildiyi zonaya bitişik ərazilərdə hərbi xidmət keçən hərbi qulluqçuların vəzifə maaşlarına 100 faiz həcmində müddətli əlavələr təyin edilib.

"İşğaldan azad edilmiş və hazırda infrastruktur qurulmayan ərazilərdə hərbi xidmət keçən hərbçilərin vəzifə maaşlarına isə 50 faiz həcmində müddətli əlavələr təyin olunub.

Qeyd edək ki, əmr cari ilin yanvar və fevral ayları üçün ödəniləcək.

Xatırladaq ki, bir müddət öncə hərbçilərin maaşlarının azaldılması böyük səs-küyə səbəb oldu. Baş verənlər geniş narazılıq yaratdı. Müxtəlif müzakirələr aparıldı, etirazlar edildi.

Sözügedən əmri “Sherg.az”a dəyərləndirən Qarabağ qazisi Rey Kərimoğlu hərbçilərin əmək haqlarının azaldılmasını davamlı olaraq pislədiyini söyləyib:

“Məsələnin Ali Baş Komandanın diqqətinə çatdırılması üçün əlimizdən nə gəlibsə, etmişik. Hətta dövlət strukturlarının rəhbərləri ilə müəyyən görüşlərimiz də oldu. Bizə bildiriblər ki, baş verənlər Prezidentə çatdırılıb.

Çox şadam ki, ön cəbhədə xidmət göstərən hərbçilərin əmək haqları bərpa edildi. Ümid edirəm ki, həqiqətən də belə davam edəcək.

Sırf ön cəbhədə xidmət etdikləri üçün hərbçilərin ikiqat maaş alması onların haqqıdır. Ona görə də çox sevinirəm. Bilirdik ki, cənab Prezident bu olaylardan xəbərdar olan kimi müsbət qərar qəbul edəcək.

Bu günə qədər baş verən bütün hadisələrdə olduğu kimi yenə də ölkə başçısı xəbər tutar-tutmaz problem həllini tapdı. Hadisə dəqiq araşdırıldıqdan sonra bəlli oldu ki, Müdafiə Nazirliyinin olanlarda günahı yox idi. Günah birbaşa Maliyyə Nazirliyinindir.

Problem nazirliyin rəhbəri Samir Şərifovdan qaynaqlanırdı. Hətta deyərdim ki, bu, sabotajdır”.












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.