Azərbaycanda özəl məktəblərin illik qiymətləri təhsil səviyyəsi, təklif olunan xidmətlərdən, şagirdin oxuduğu bölmə və sinifdən asılı olaraq dəyişir. Bakıda yerləşən bəzi prestijli özəl məktəblərin illik təhsilhaqları adətən yüksək olur.

“Operativ Media” özəl təhsil müəssisələrinin bəzilərinin illik qiymətlərini araşdırıb:

Heydər Əliyev adına Müasir Təhsil Kompleksi

"Heydər Əliyev adına Müasir Təhsil Kompleksi" 2001-ci il sentyabr ayının 1-də Ulu öndər, Ümummilli lider Heydər Əliyevin bilavasitə iştirakı ilə açılıb. Kompleksidə 2 yaşdan 17 yaşa qədər olan uşaqlar məktəbəqədər, ibtidai və orta təhsil pillələri üzrə təhsil alır.

"Heydər Əliyev adına Müasir Təhsil Kompleksi"ndə məktəbəqədər təhsilhaqqı illik 12 000 – 13 000 manatdır. İbtidai təhsil üzrə təhsilhaqqı 17 500 AZN-dir. Azərbaycan bölməsində V-IX siniflər üzrə 14 000 AZN, X-XI siniflər üzrə 14 200 AZN təşkil edir. Rus bölməsində VIII-IX siniflər üzrə təhsilhaqqı 18 000 AZN, X-XI siniflər üzrə 18 200 AZN təşkil edir. Beynəlxalq bölmə üzrə V-IX siniflər üzrə təhsilhaqqı 18 000 AZN, X-XII siniflər üzrə 18 200 AZN-dir. Bu qiymətə gündə 3 dəfə qidalanma, il ərzində tədris prosesi ilə bağlı bir neçə dəfə ekskursiya və dərnəklər də daxildir. Dərs 08:30-dan 16:30-a qədər davam edir.

“Baku Oxford School”

“Baku Oxford School”da da tədris ingilis dilində aparılır. Bu məktəbdə erkən-ilkin hazırıq mərhələsi üçün qiymət - 3 yaş üçün 8 000, 4 və 5 yaşlı uşaqlar üçün 9 000 təşkil edir. İbtidai siniflər üçün qəbul qiymətləri 16 500, IV-VIII siniflərdə isə 17 000, IX-XII siniflər üçün 17 500 AZN təşkil edir. Bu məbləğə dərsliklər, gündəlik, forma, nahar, dərnəklər və idman zalından tam istifadə daxildir. Ödənişi bütöv deyil, rüblərə bölərək etmək olur.

Azərbaycanlı şagirdlər dövlət attestat imtahanlarını 11-ci sinifdə verirlər. Məktəbdə tədris dili İngilis dilidir. Bundan başqa şagirdlər Azərbaycan, Rus və əlavə xarici dil - Fransız, Alman və ya İspan dilini öyrənməyi seçə bilərlər.

Qeyd edək ki, məktəb avtobusu üçün xidmət haqqı yarım illik və ya illik ödənilə bilər. Məktəb avtobusu üçün illik ödəniş 2 000 manatdır.

“Sabis Sun” Beyəlxalq Məktəbi

“Sabis Sun” Beyəlxalq Məktəbində təhsil yalnız ingilis dilində aparılır. “Sabis Sun” Beyəlxalq Məktəbində hər sinif üçün təhsilhaqqı fərqlidir. Erkən-ilkin hazırıq mərhələsi üçün qiymət 11 850 təşkil edir. I-IV siniflərdə isə 12 530 - 13 252, V- IX siniflər üçün 13 546 - 13 878, X sinif üçün 14 450, XI və XII siniflər üçün isə 15 000 AZN təşkil edir. Bu məktəbdə hər sinifdə təhsilhaqqı fərqlənir. Məktəb avtobusu üçün xidmət haqqı illik 1 800 manatdır.

Məktəbəqədər təhsil siniflərinə (3-5 yaşına qədər) qəbul ilə bagli akademik tələblər mövcud deyil. Bu səviyyədən olan potensial sagirdlər müsahibədən keçir; onlar tualetdən istifadə etməyi bacarmalı, danışa və sadə təlimatlara əməl edə bilməlidir.

Bütün digər səviyyələrdən olan potensial sagirdlər ingilis dili və riyaziyyatin əsas mövzulari üzrə yoxlama testindən keçirilirlər. Bu testlər sagirdlərin hər bir fənn üzrə nəzərdə tutulmuş minimal standarta uyğun olub-olmadıqlarını müəyyən etməyə kömək edir. Bundan sonra məktəb yerləşdirmə üzrə yekun qərarini verir. Təhsil müəssisəsindən qiymətlərin yüksək olmasını məktəbdə dərs keçən müəllimlərin 90 faizdən çoxunun əcnəbi olması ilə əlaqələndirirlər.

Xəzər Universiteti Dünya Məktəbi

"Xəzər Universiteti Dünya Məktəbi"ndə təhsil 3 pillədən ibarətdir. Məktəbdə tədris Azərbaycan, rus və ingilis dili üzrə aparılır. Məktəbdə təhsilhaqqı isə aşağıdakı kimidir:

I-IV siniflərdə Azərbaycan və rus 10 000 AZN, ingilis bölməsi üçün isə 12 500 AZN, V-XI siniflər üçün Azərbaycan-rus bölməsi üzrə 10 500 AZN, V-VIII siniflər ingilis bölməsində təhsilhaqqı 14 000 AZN, IX -XI siniflər üçün isə 16 500 AZN təşkil edir.

Məktəbə şagirdlər müsabiqə əsasında qəbul edilirlər. Müsabiqədə II-XI sinif şagirdlərinin bilik və bacarıq səviyyələri təhsil aldıqları sinfə uyğun test ilə yoxlanılır. Birinci sinfə qəbul olmaq istəyən uşaqlar psixoloq və həkim müayinələrindən keçirilir. Məktəbə qəbul ediləcək şagirdlər “Şagird qəbulu üzrə məktəb komissiyası”nın rəyi əsasında müəyyən edilir.

Avropa Azərbaycan Məktəbi

"Avropa Azərbaycan Məktəbi" (AAM), Avropa Azərbaycan Cəmiyyəti (TEAS) tərəfindən 2011-ci ildə qurulan özəl bir ümumtəhsil məktəbidir. Məktəb Azərbaycan, Belçika, Fransa, Almaniya və Birləşmiş Krallıqda nümayəndəlikləri ilə beynəlxalq miqyasda tanınır. Avropa Azərbaycan Məktəbində də təhsil dili yalnız ingilis dilidir.

İbtidai siniflər üçün təhsilhaqqı 11 250 AZN, V-IX siniflər üçün 13 500 AZN, X-XII siniflər üçün isə 16 150 AZN təşkil edir. Məktəbəqədər təhsil pilləsində isə məbləğ 8 500 AZN-dir.

“Oxbridge Academy” növbəti  tədris ilinə yeniliklərlə başlayacaq

“Oxbridge Academy” məktəbində tədris proqramı Böyük Britaniya təhsil sisteminin tələblərinə əsasən tərtib edilib. Dərslər dünyanın ən aparıcı təhsil şirkətlərindən olan, 150 illik tarixə malik "Pearson"un EDEXCEL proqramı əsasında inglis dilində aparılır. Təhsilini uğurla başa vuran şagirdlər Azərbaycan Respublikası Elm və Təhsil Nazirliyinin tam orta təhsil haqqında attestatı ilə yanaşı, Edexcel (Pearson) tərəfindən Britaniya standartlarına uyğun beynəlxalq tam orta təhsil sertifikatı - "A Level" diplomunu da əldə edirlər. 

Oxbridge Academy təhsilhaqqı isə I – VI siniflərdə 7 500 dollar , VII -IX siniflərdə 8 500 dollar X-XI siniflərdə 10 000 dollar, XII sinifdə isə 12 000 dollar təşkil edir.

“İdrak ” liseyi

"İdrak" liseyində təhsil səviyyəsində tədris 3 dildə aparılır. Şagirdlərə gün ərzində 3 dəfə nahar verilir. Valideynlər gün ərzində saat 09:30-dan 13:30-a qədər onlayn kameralar vasitəsilə sinif otaqlarını izləmək imkanına malikdirlər.

Azərbaycan və rus bölməli üçün I-V siniflər 10 000, V-XI 10 500 manat təşkil edir. İngilis bölməsi üçün qiymətlər isə I-V sinizlər üzrə 12 500, V-IX siniflərdə 14 000, X-XI siniflər üzrə isə 16 500 AZN-dir.

Gülcahan Məmmədova