"Samsung" korporasiyası bahalı smartfonlar üçün yeni bir brend buraxmağı qərara alıb.

Bu barədə "E-Today" nəşri yazıb.

Məlumata görə, şirkət bütün smartfonlarını "Galaxy" ticarət markası altında istehsal etməsindən narahatdır. Korporasiyanın rəhbərləri hesab edir ki, bu yanaşma markanın dəyərini azaldır. Bu səbəbdən, "Samsung" premium cihazları istehsal edəcək ayrıca bir brend yaratmağı düşünür.

Qeyd edək ki, "Galaxy" məhsul xəttinə Z, S, A, M və F seriyalarına aid smartfonlar daxildir. Müqayisə üçün, "Apple" yalnız "iPhone" brendi altında bahalı cihazlar istehsal edir.

Cənubi Koreya şirkəti ayrı ticarət markası ilə Amerika rəqibi ilə mübarizə aparmağın və premium smartfonları bazara çıxarmağın daha asan olacağına inanır.

Mütəxəssislər "Hyundai" korporasiyasının uğurunu müsbət nümunə kimi görürlər. Yerli avtomobil istehsalçısı "Genesis" lüks brendini yaradaraq yalnız premium modellər istehsal etməkdə müvəffəqiyyət əldə edib. Belə ki, ayrı ticarət markası "Hyundai" brendinin imicinin yaxşılaşmasında əsas rol oynayıb.