Yay tətili uşaqlar üçün yalnız bir “ara” deyil, bəzən bir “nəfəs”, bəzən də “formalaşma dövrü”dür.
Təəssüf ki, bəzi valideynlər bu dövrü ya tənbəlliyin başlanğıcı, ya da təkrar dərs mövsümü kimi qəbul edir. Halbuki, beynəlxalq təcrübə və elmi araşdırmalar göstərir ki, tətildə düzgün balans qorunmadıqda, həm psixoloji, həm də akademik inkişaf zərər görür.

Məsələn, “Harvard Graduate School of Education” tərəfindən aparılan araşdırmaya görə, il ərzində ardıcıl təhsil alan uşaqların 65%-də yay tətili boyunca psixoloji tükənmə simptomları (emosional yorğunluq, qıcıqlılıq, diqqət yayını) müşahidə olunur.

Lakin ABŞ Təhsil Departamentinin məlumatına görə isə orta məktəb şagirdləri yay tətilində oxu və riyaziyyat üzrə 17–34%-ə qədər geriləmə yaşayır. Bu itkilər xüsusilə evdə oxu mühiti olmayan uşaqlarda daha çox müşahidə olunur.

Bəs bunun həlli nədir?

Əlbəttə ki, sərt tədris yox, oyunla öyrənmə, sərbəst oxu və təcrübə yönümlü fəaliyyətlər.

Araşdırmalar onu da göstərir ki, tətil zamanı muzey ziyarətləri, təbiət gəzintiləri və mədəni tədbirlərdə iştirak edən uşaqlarda yaradıcılıq və tənqidi düşünmə qabiliyyəti 25–30% artır.

Yay tətili, uşağın zehni və emosional “yenidən yüklənməsi” üçün bir fürsətdir. Bu dövrdə uşaq nəinki dincəlir, həm də özünü, maraqlarını, münasibətlərini və sərhədlərini öyrənir.

Unutmayaq ki, uşaqlıq həyatı dadmaq dövrüdür.

Leyla Mirzə, Bizimyol.info