"Müsahibə yalnız namizədin özünü təqdim etməsi deyil, həm də qarşılıqlı tanışlıq prosesidir. İşəgötürən və namizəd bu dialoq vasitəsilə bir-birinə nə dərəcədə uyğun olduqlarını müəyyənləşdirirlər. Lakin düzgün seçilməmiş və ya vaxtsız verilmiş suallar namizədin motivasiyası və peşəkarlığı barədə mənfi rəy yarada bilər".

Valyuta.az xəbər verir ki, bunu gazeta.ru-ya "NC Logistic" şirkətinin HR bölmə rəhbəri Yuliya Zaval­kina danışıb.

Onun sözlərinə görə, şirkət haqqında açıq mənbələrdə rahatlıqla tapıla biləcək sadə məlumatı müsahibə zamanı soruşmaq hazırlıqsızlıq təəssüratı yaradır. Namizədlərə tövsiyə olunur ki, əvvəlcədən şirkət barədə ümumi bilgiləri öyrənsinlər və müsahibədə daha dərin, strateji məsələlər barədə suallar versinlər.

Ekspert qeyd edib ki, müsahibəni maliyyə məsələləri ilə başlamaq düzgün deyil: "Bu, namizədin əsas marağının yalnız pul olduğunu göstərə bilər. Əvvəlcə öz bacarıqlarınızı və şirkətə verə biləcəyiniz töhfəni nümayiş etdirin. Əməkhaqqı mövzusuna isə işəgötürən toxunduqdan sonra qayıtmaq daha məqsədəuyğundur".

Yuliya Zaval­kina əlavə edib ki, yalnız şəxsi maraqlara yönələn suallar - tez-tez məzuniyyət, sərbəst iş qrafiki və ya digər güzəştlərlə bağlı söhbətlər - işəgötürəndə mənfi rəy formalaşdırır. Şirkətlər ilk növbədə ümumi məqsədlərə sadiq komanda üzvləri axtarır.

Bundan başqa, internetdə yayılan mənfi rəyləri və ya rəhbərlik haqqında şayiələri müsahibədə sorğulamaq da tövsiyə olunmur. Bu, namizədin dedi-qoduya meylli olduğu təəssüratını yarada bilər. Şəxsi mövzular - məsələn, müsahibə aparan şəxsin ailə vəziyyəti və ya hobbiləri ilə maraqlanmaq da işgüzar etiketin pozulması sayılır.

HR mütəxəssisinin sözlərinə görə, düzgün yanaşma şirkətin inkişaf imkanları, peşəkar yüksəliş və təlim proqramları, komanda və iş mühiti barədə suallar verməkdir:

"Müsahibə namizədin həm faydalı məlumat əldə etməsi, həm də özünü ən yaxşı tərəfdən göstərməsi üçün imkandır. Yaxşı düşünülmüş suallar isə arzulanan vəzifəni qazanmaq şansını artırır".