Həbsdə olan əməkdar müəllimə: - "Utanıram, qurban olum, vaxt verin..."
29-01-2018, 14:36
Dələduzluqda təqsirləndirilən 62 yaşlı əməkdar müəllimə Nuriyə Ağayevanın cinayət işi üzrə məhkəmə davam edib.
Lent.az-ın məlumatına görə, Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən prosesdə təqsirləndirilən şəxs məhkəmədən vaxt istəyib.
O bildirib ki, zərərçəkmiş şəxslərə dəymiş ziyanı ödəyəcək: "Xahiş edirəm, mənə bir az da vaxt verin. Mən bu şəxslərin pulunu bir nəfərə vermişəm, o da gətirib qaytaracaq. Hazırda həmin adam Türkiyədədir".
Ənəkdar müəllimə qeyd edib ki, zərərçəkmiş şəxslərin üzünə baxa bilmir: "Vallah, baxa bilmirəm, utanıram. Xahiş edirəm, qurban olum, mənə bir az vaxt verin. Pulları ödəyəcəm".
Hakim təqsirləndirilən şəxsə 20 gün vaxt verib. Proses fevralın 19-da davam edəcək.
Qeyd edək ki, N.Ağayeva 5 nəfərə qarşı dələduzluq edib. O, vətəndaşları övladlarını ali məktəblərə qəbul etdirəcəyini vəd edərək pullarını ələ keçirib. Dəymiş ziyan ümumilikdə 50 min manata yaxındır.
O, Cinayət Məcəlləsinin 178.3.2-ci (dələduzluq; külli miqdarda törədildikə) maddəsi ilə ittiham edilir.