Litva Dəmiryolları Agentliyi Rusiyanın Kalininqrad vilayətinə Avropa Birliyinin sanksiyaları altına düşən məhsulların daşınmasının bu gündən etibarən dayandırılması barədə xəbərdarlıq təqdim edib. Vilayətin qubernatoru Anton Əlixanovun dediyinə görə, qadağa Rusiyadan vilayətə Litva dəmiryolları ilə daşınan yüklərin 50 faizdən çoxunu əhatə edir.

Qubernator bildirib ki, onlar bu addımı gözlədiklərinə görə Baltik dənizi ilə yükdaşımaları təmin etmək üçün əlabə bərələr əldə edilib.

Rusiyalı ekspertlər isə bu addımı Litvanın Kalininqradı mühasirəyə alması kimi qiymətləndirərək, mühasirənin aradan qaldırılması üçün həbri əməliyyatın keçirilməsi variantını müzakirə etməyə başlayıblar. Hətta bəzi hərbi ekspertlər NATO-nun vilayəti ələ keçirmək planının olduğunu, Rusiyanın bu halda atom silahından istifadə etməyə məcbur qalacağını da iddia etməkdədirlər./musavat.com