Danimarka polisi Quranın yandırılması ilə bağlı son aksiyalardan sonra, şərti olaraq avqustun 10-na kimi ölkənin daxili sərhədlərində nəzarəti müvəqqəti olaraq gücləndirir.
Bizimyol.info xəbər verir ki, bu barədə Krallığın Ədliyyə Nazirliyinin press-relizində deyilir.

Hesabatda qeyd edilir ki, Milli Polis, Polis Kəşfiyyat Xidmətinin (PKX) məsləhəti ilə Danimarkanın daxili sərhədlərində fəaliyyəti müvəqqəti olaraq gücləndirməyi zəruri hesab edib. PKX-in məlumatına görə, “son günlərdə Quran yandırılması təhdidlərin hazırkı mənzərəsinə təsir etdi.

“Səlahiyyətlilər belə qənaətə gəliblər ki, indi Danimarkanın üzləşdiyi xüsusi və davamlı təhlükələrə qarşı çıxmaq üçün Danimarkaya daxil olanlara diqqəti artırmaq lazımdır. Hazırda gücləndirilmiş sərhəd tədbirlərinin 2023-cü il avqustun 10-na qədər davam edəcəyi gözlənilir”, - press-relizdə deyilir.

Ədliyyə naziri Piter Hummelqaardın sözlərinə görə, sərhəd nəzarətinin artırılması vəziyyətin ciddiliyini vurğulayır.

"Hökumət mövcud vəziyyətə çox ciddi yanaşır. Qeyd edirəm ki, hakimiyyət məhdud müddət ərzində təhlükəsizlik baxımından Danimarka sərhədlərində polisin fəaliyyətini gücləndirməyin lazım olduğu qənaətinə gəlib", - deyə o verdiyi mesajda bildirib.

Bundan əvvəl “Danimarka Patriotları” sağçı radikal qruplaşmasının nümayəndələri Misir, Türkiyə və İraq səfirliklərinin binaları qarşısında Quranı yandırıblar. Bununla bağlı Danimarka Xarici İşlər Nazirliyi bəyan edib ki, müqəddəs kitabların və dini simvolların məhv edilməsi qınamağa layiq olan biabırçı bir hərəkətdir. Agentlik krallığın dini etiqad azadlığına malik olduğunu və bir çox vətəndaşın İslam dininə etiqad etdiyini xatırladıb. Xarici İşlər Nazirliyi isə “ifadə və sərbəst toplaşma azadlığına hörmət edilməsinin zəruriliyinə” işarə edib.

Danimarka hökuməti, digər ölkələrin, mədəniyyətlərin və dinlərin təhqir olunduğu, bunun Danimarkanın təhlükəsizliyinə ciddi mənfi təsir göstərə biləcəyi xüsusi hallarda ictimai toplantılara icazə verilməməsi imkanlarını araşdıracağını bildirib.