Böyük Britaniya parlamentinin yerləşdiyi Londondakı Vestminster sarayı təhlükə saçır.

Bu barədə Viktoriya və Albert Muzeyinin direktoru, siyasətçi Tristram Hant bildirib.

Britaniyalı siyasətçi qeyd edib ki, Vestminster sarayının binası acınacaqlı vəziyyətdədir. Binanın fasadlarında hörgü zədələnib, içəridən rütubət iyi gəlir, aşağı mərtəbədəki otaqlarda isə siçan sürüləri gəzir. Bundan əlavə, elektrik naqillərinin nasazlığı səbəbindən saray binası daim alovlanma təhlükəsi ilə üzləşir.

Hant vurğulayıb ki, binanın içərisindəki tarixi divar rəsmləri və Britaniya parlamentinin palataları risk altındadırlar. O, bütövlükdə Vestminster sarayının tamailə iyrənc çürümə atmosferinə qərq olunduğunu bildirib.

Mənbə: Financial Times