İsrail Livanla sərhəddə İsrail əsgərləri ilə Hizbullah militantları arasında baş verən toqquşmalara görə İsrailin şimalındakı sakinlərin boşaldıqları evlərə qayıtmasını mümkün etmək məqsədi ilə HƏMAS-a qarşı müharibəsini genişləndirdiyini açıqlayıb. İsrailin baş naziri Benyamin Netanyahunun ofisi bildirib ki, təhlükəsizlik kabineti bu addımı bazar ertəsi gecə təsdiqləyib.

HƏMAS-ın müttəfiqi olan Hizbullah Qəzzada müharibə başlayandan qısa müddət sonra demək olar ki, gündəlik hücumlarına başlayıb və on minlərlə insan evlərini tərk etməyə məcbur olub. HƏMAS kimi İran tərəfindən dəstəklənən Hizbullah Qəzza ilə bağlı atəşkəs razılaşması əldə olunsa, hücumları dayandıracağını bildirib.

Atəşkəsə nail olmaq üçün səylər aylardır davam edir. ABŞ, Misir və Qətər rəsmiləri həm İsrail, həm də HƏMAS üçün uyğun şərtlər tapmağa çalışırlar.

ABŞ dövlət katibi Antoni Blinken Yaxın Şərqdəki əsas regional tərəfdaşlara yenidən işlənmiş atəşkəs təklifini təqdim etmək üçün davam edən səylər fonunda çərşənbə axşamı Misirə səfər edir.

“Biz regiondakı tərəfdaşlarımızla, xüsusən də Misir və Qətərlə bu təklifin nələri ehtiva edəcəyi ilə bağlı əlaqə saxlamağa davam edirik və əmin olmaq istəyirik ki, bu təklif yekun razılaşmanın əldə edilməsinə yardım edəcək”, Dövlət Departamentinin sözçüsü Metyu Miller bazar ertəsi jurnalistlərə deyib.

Rəsmilər vaxt cədvəlinin tezliklə təqdim ediləcəyini bildirsələr də, ABŞ yenidən işlənmiş təklif üçün vaxt cədvəli təqdim etməyib. Təklif İsrail və HƏMAS arasında atəşkəsin təmin edilməsi və 7 oktyabr 2023-cü il tarixində müharibənin başlanğıcında HƏMAS militantları tərəfindən ələ keçirilən girovların azad edilməsi məqsədi ilə çıxılmaz vəziyyətin arxasında duran əsas məsələlərin həllini nəzərdə tutur.

Blinken Qahirədə Misirin xarici işlər naziri Bədr Abdelatti ilə ABŞ-Misir Strateji Dialoqunun açılış sessiyasına həmsədrlik edəcək. Millerin sözlərinə görə, Blinken Qəzzada atəşkəsin təmin edilməsi, bütün girovların azad edilməsi, fələstinlilərin əzablarının yüngülləşdirilməsi və daha geniş regional təhlükəsizliyin təşviq edilməsi səylərini müzakirə etmək üçün Misir liderləri ilə də görüşəcək. Lakin Blinkenin səfəri İsrailin liderləri ilə danışıqları nəzərdə tutmur.

Blinken bazar ertəsi İsrailin müxalifət lideri və keçmiş baş nazir Yair Lapid ilə görüşüb. Dövlət Departamentindəki görüşdən sonra jurnalistlərə açıqlama verən Lapid İsrailin girov razılaşmasına və Qəzzada müharibənin dayandırılmasına ehtiyac olduğunu bildirib və heç bir siyasi prosesin və ya təlatümlərin razılaşmaya təsir etmədiyini vurğulayıb.

Lapid ABŞ-ı HƏMAS-a “girov müqaviləsi bağlamağa” imkan verməməyə çağırıb. “Biz [qalan girovları] vətənə qaytarmayana qədər İsrail bir dövlət olaraq sağalmayacaq. Bu, bizim varlığımız üçün vacibdir”, Lapid bildirib.

HƏMAS 2023-cü ilin oktyabrında İsrailin cənubuna 1200 nəfərin ölümünə və 250 girovun əsir düşməsinə səbəb olan hücumu ilə münaqişəyə səbəb olub. İsrailin Qəzzada əks-hücumu nəticəsində 41 200-dən çox fələstinli öldürülüb, İsrail onlar arasında bir neçə min militant döyüşçünün olduğunu bildirir.

HƏMAS ABŞ, Böyük Britaniya, Aİ və digər Qərb dövlətləri tərəfindən terror qruplaşması elan edilib.