Son üç gündə Tbilisidəki etiraz aksiyalarında 200 nəfər saxlanılıb. Bunu Gürcüstanın Daxili İşlər Nazirliyinə istinadən Rustavi2 televiziya kanalı xəbər verib.

Saxlanılanlara polisə tabe olmamaq və kiçik xuliqanlıq maddələri üzrə protokol tərtib edilib. Bəzi şəxslər artıq azad edilib, bəziləri müvəqqəti saxlama kameralarındadır, digərləri isə xəstəxanaya yerləşdirilib.

Dekabrın 1-nə keçən gecə 50 nəfər saxlanılıb. On minlərlə insan ardıcıl olaraq üç gün Tbilisidə parlament binası qarşısına toplaşıb.

Etirazçılar bir neçə küçədə barrikadalar qurub. Polis toplaşan insanları dağıtmaq üçün su şırnaqları və gözyaşardıcı qazlardan istifadə edib. Cavab olaraq, bəzi etirazçılar fişənglərdən hazırlanan pulemyotlardan istifadə ediblər. Bir anlıq parlament binasında yanğın baş verib, lakin tezliklə söndürülüb.

Səhərə yaxın mitinq iştirakçıları parlamentin qarşısındakı meydandan opera binasına tərəf sıxışdırılıb. Sonra etirazçılar Tbilisi Dövlət Universitetinin birinci korpusuna, Çavçavadze və Melikishvili prospektlərinin kəsişməsinə doğru hərəkət edib və səhərədək orada qalıblar. Bəzi etirazçılar hələ də universitet binasının qarşısında qalmaqdadır.

Tbilisidə genişmiqyaslı aksiyalar Gürcüstanın Baş naziri İrakli Kobahidzenin 2028-ci ilə qədər Avropa İttifaqına üzvlük müzakirələrinin təxirə salındığını elan etməsindən sonra 28 noyabr axşamı başlayıb. Hökumətin bu qərarı ilə razılaşmayanlar hər axşam etiraz aksiyalarına çıxır.

Etirazlar sərt saxlanmalar və təhlükəsizlik qüvvələrinin etirazçılara və jurnalistlərə qarşı zor tətbiq etməsi ilə müşayiət olunur. Bundan əlavə, etirazçıları dağıtmaq üçün su şırnaqları və gözyaşardıcı qazdan istifadə edilir.

Məlumdur ki, 30 noyabr gecəsi təhlükəsizlik qüvvələrinin hərəkətləri nəticəsində 38 nəfər xəstəxanaya yerləşdirilib. Bir gün əvvəl isə 33 nəfər xəsarət alıb.