Mümkün müflisləşmə ilə bağlı yayılan xəbərlər fonunda, 133 illik "Eastman Kodak" şirkəti fəaliyyətini dayandırmaq niyyətində olmadığını açıqlayıb.

Valyuta.Az "The Verge" nəşrinə istinadla xəbər verir ki, şirkət tənzimləyici orqanlara təqdim etdiyi son sənəddə qarşıdakı 12 ay ərzində ödənilməsi tələb olunan təxminən 500 milyon dollar borcu qarşılamaqda çətinlik çəkə biləcəyini bildirib. Bu isə gələcək fəaliyyəti ilə bağlı suallar yaradıb. "Kodak" şirkətinin baş marketinq direktoru Dəniz Qoldberq (Deniz Goldberg) sənəddə yer alan "fəaliyyətin davamlılığı" ifadəsinin borcun vaxtının çatması ilə bağlı texniki tələb olduğunu izah edib.

2025-ci ilin avqustuna olan məlumata görə, "Kodak"ın təxminən 477 milyon dollar məbləğində əsas borcu və 100 milyon dollar dəyərində imtiyazlı səhmləri mövcuddur. Şirkət bu borcun əsas hissəsini — təxminən 300 milyon dollarını — 2025-ci ilin dekabrında "Kodak" Təqaüd Gəliri Planının ("Kodak Retirement Income Plan", KRIP) likvidasiyası və hesablaşması tamamlandıqdan sonra əldə ediləcək vəsaitlə ödəməyi planlaşdırır. Əlavə olaraq, fondun 200 milyon dollarlıq aktivinin də pula çevrilməsi nəzərdə tutulur. Kredit razılaşmalarına əsasən, həmin 300 milyon dollar borcun bir hissəsinin əvvəlcədən ödənilməsinə yönəldiləcək, daha sonra isə şirkət qalan 177 milyon dollar borcu və 100 milyon dollar imtiyazlı səhmi yenidən maliyyələşdirməyi və ya müddətini uzatmağı planlaşdırır.

Şirkət rəhbərliyi KRIP əməliyyatının tamamlanmasından sonra balansın "son illərin ən güclü göstəricilərinə" çatacağını və xalis borcun demək olar ki, sıfıra enəcəyini bildirib. Hazırkı əməliyyatlar isə rəhbərliyə görə stabil və özünü təmin edən vəziyyətdədir və gündəlik fəaliyyət üçün təqaüd fondundan vəsait ayrılması nəzərdə tutulmur.