Norveç bazar ertəsi Ukraynaya 242 milyon dollarlıq yeni hərbi yardım elan edib. Buna ölkənin mühüm Qara dəniz limanlarına çıxışı təmin etməyə yardım daxildir.

"Ukrayna əhalisini və Ukrayna infrastrukturunu Rusiyanın Qara Dəniz Donanmasının hücumlarından qorumaq vacibdir. Ukrayna üçün kritik gəlir yaradan taxıl və digər məhsulların dəniz yolu ilə ixracını qorumaq da vacibdir”, Baş nazir Conas Qahr Store açıqlamasında deyib.

Yardıma Ukrayna əsgərlərinin təlimi, eləcə də minalardan təmizləmə əməliyyatlarının maliyyələşdirilməsi daxildir.

Norveçin müdafiə naziri Byorn Arild Qram bildirib ki, minalar Qara dənizdə “ciddi təhlükə”dir və yardım Ukrayna qüvvələrinə sahil yaxınlığında minaları aşkar edib zərərsizləşdirməyə kömək edəcək.

Ukrayna ordusu bazar ertəsi bildirib ki, Rusiya qüvvələrinin gecə hücumda istifadə etdiyi 49 drondan 27-ni vurub.

Ukrayna Hərbi Hava Qüvvələri bildirib ki, onlar Çerkası, Çernihiv, Dnipropetrovsk, Xarkiv, Xmelnitski və Sumı vilayətləri üzərində vurulub.

Çerkası qubernatoru İhor Taburets məhv edilən dronun dağıntılarının elektrik xətlərini zədələdiyini, lakin itki olmadığını deyib.

Rusiya Müdafiə Nazirliyi bazar ertəsi qüvvələrinin Kursk bölgəsi üzərində Ukraynaya məxsus üç dronu məhv etdiyini bildirib.