Avstriyanın paytaxtı Vyanada Azərbaycan Prezidenti İlham Əliyev və Ermənistan Baş naziri Nikol Paşinyan arasında görüşə start verilib.

Axar.az xəbər verir ki, "Bristol" otelində keçirilən görüşdə iki ölkənin xarici işlər naziri və ATƏT-in Minsk Qrupunun həmsədrləri də iştirak edir. Daha sonra iki ölkə liderinin təkbətək görüşü keçiriləcək.

Görüşün 2 saat davam edəcəyi təxmin edilir.

***

Prezident Administrasiyasının xarici siyasət məsələləri şöbəsinin müdiri Hikmət Hacıyev də görüşlə bağlı Tvitter səhifəsində məlumat verib.

“Azərbaycan münaqişənin BMT Təhlükəsizlik Şurasının qətnamələri, Helsinki Yekun Aktına və beynəlxalq hüququn prinsiplərinə uyğun şəkildə mövcud format əsasında həllini dəstəkləyir”, - H.Hacıyev qeyd edib.

***

Prezident İlham Əliyev və Nikol Paşinyan arasında təkbətək görüş başlayıb.

***

Ermənistan və Azərbaycan liderlərinin təkbətək görüşü baş tutub. Təkbətək danışıqlar 1,5 saat davam edib.

Danışıqlara yenidən xarici işlər nazirləri və ATƏT-in Minsk Qrupunun həmsədrləri qatılıblar.

Ümumilikdə liderlərin görüşü 2 saatdan çoxdur davam edir.