"Putinin bir gün Ukraynanı terrorda birbaşa ittiham etməsi, ertəsi gün bu suala cavabdan yayınması arasında tərəddüdlər Kremlin bununla bağlı şablon xətti hələlik işləyib hazırlamadığını göstərir..."

"Terror aktı radikal islamşılar tərəfindən hazırlanıb, Ukrayna xüsusi xidmət orqanları buna dəstək verib..."

Putinin ətrafı Ukraynanın "Crocus"a hücumunda əli olduğuna inanmır

Rusiya hakimi Vladimir Putin və təcavüzkar ölkənin digər yüksək vəzifəli məmurları "Crocus City Hall" ticarət mərkəzində terror aktının arxasında, guya, Ukraynanın dayanması barədə narrativlə bağlı ardıcıl olmayan mövqe sərgiləyir.

Moderator.az xəbər verir ki, bu barədə Amerikanın müharibənin öyrənilməsi İnstitutunun (ISW) yeni hesabatında deyilir.

Analitiklərin fikrincə, bu, Kremldə baş vermiş insidentin müzakirəsi üzrə şablon xəttin işlənib hazırlanmadığından xəbər verir. Bu, Rusiya elitasının terrorun nəticələrindən sonra keçirdiyi şokla bağlıdır.

Məlumat verilir ki, Rusiya siyasətçiləri ticarət mərkəzinə hücumla bağlı ardıcıl ritorik xətti dəstəkləməyə cəhd edir, çünki öz informasiya əməliyyatlarını kəşfiyyat və hüquq-mühafizə orqanlarının gerçək uğursuzluqları ilə necə uzlaşdıracağını sonadək anlamır.

Qeyd edilir ki, Putin və məmurları İŞİD-in məsuliyyəti öz üzərinə götürdüyü terror aktında Ukraynanın iştirakı barədə feyk narrativin ətrafında tam sıx birləşməyib.

"Martın 23-də terror aktından sonra öz müraciətində diktator bəyan edib ki, hücum edənlər Ukrayna ilə əlaqəlidir. Lakin martın 26-da Rusiya Federasiyası Prokurorluğunun kollegiya iclasında çıxışı zamanı o, "Crocus"a hücumu xatırladıb, müstəntiqlərə iş üzrə bütün faktlatı müəyyən etməyə çağırış edib, lakin Ukraynanı bu hücumda birbaşa və ya dolayısı ilə ittiham etməyib", - analitiklər izah edib.

Onlar xatırladıb ki, Rusiya hakimi öz müraciətində Ukrayna hökumətini yalnız bir dəfə, həm də bununla bağlı deyil, Rusiyanın xaricdə "itirilən" əmlakının qaytarılması barədə danışanda xatırladıb.

Bu, onun mövqeyinin əvvəlki ittihamları ilə müqayisədə xeyli dəyişməsidir. Bu zaman Kremlin mətbuat katibi Dmitri Peskov həmçinin Ukraynanın "Crocus"a hücumunu təşkil etməsi barədə jurnalistlərin sualına cavab verərkən bunu birbaşa bəyan etməyib.

"Putinin bir gün Ukraynanı birbaşa ittiham etməsi və ertəsi gün bu suala cavabdan yayınması arasında tərəddüdlər onu göstərir ki, Kreml terror hücumunun necə müzakirə edilməsi ilə bağlı şablon xətti hələ işləyib hazırlamayıb, bu, ehtimal ki, qismən terror aktından sonra Rusiya elitasının onun nəticələrindən şok keçirməsi ilə bağlıdır", - ISW hesab edir.

Eyni zamanda digər məmurlar Ukraynanın terror aktında iştirakı barədə Kremlin narrativini daha da gücləndirib və bu zaman etiraf edib ki, Rusiya hakimiyyəti üçün bu hücum barədə kritik vacib informasiya yetərli deyil.

Putin və əlaltıları "Crocus"dakı terror haqqında nə düşünür

Martın 23-də Putin bəyan edib ki, dörd terrorçu Uktaynaya gedən yolda yaxalanıb, sonradan o, qeyd edib ki, "niyə terrorçular cinayət törətdikdən sonra məhz Ukraynaya getməyə cəhd edib, onları orada kim gözləyib" sualına cavab vermək lazımdır.

Rusiya FTX-nin direktoru Aleksandr Bortnikov qeyd edib ki, "Ukrayna xüsusi xidmət orqanları terror aktına dəstək verib, terror aktını isə radikal islamçılar hazırlayıb".

Rusiya Təhlükəsizlik Şurasının katibi Nikolay Patruşev isə birbaşa bəyan edib ki, bunun arxasında Ukrayna dayanır.

Lakin sonradan "Bloomberg" nəşri yazıb ki, Putinin ətrafı Ukraynanın "Crocus City Hall"da terror aktında əli olmasına inanmır.