“İsrail kəşfiyyat xidməti “Mossad” Tehranda HƏMAS hərəkatının Siyasi Bürosunun rəhbəri İsmayıl Haniyənin qaldığı qonaq evinə partlayıcı qurğu yerləşdirmək üçün İran təhlükəsizlik rəsmilərini işə götürüb”.
Yeniavaz.com xəbər verir ki, bu barədə Britaniyanın “The Daily Telegraph” qəzeti mənbələrə istinadən məlumat yayıb.
İyulun 31-də HƏMAS İran Prezidenti Məsud Pezeşkiyanın andiçmə mərasimində iştirak etdiyi Tehrandakı iqamətgahına İsrailin endirdiyi zərbə nəticəsində Haniyənin öldüyünü elan edib.
Amerikanın “The New York Times” qəzeti iddia edib ki, Haniyə təxminən iki ay əvvəl Tehrandakı iqamətgahına yerləşdirilən bombanın partlaması nəticəsində ölə bilər. Nəşrin mənbələrinə görə, partlayıcı qurğu Haniyə otağa gələndən sonra uzaqdan işə salınıb. “Axios” portalının məlumatına görə, “Mossad” Haniyənin öldürülməsi əməliyyatının təşkilinə cavabdehdir.
“The Daily Telegraph” yazır ki, “Mossad” əvvəlcə Haniyəni may ayında təyyarə qəzasında həlak olan İran prezidenti İbrahim Rəisinin dəfn mərasimində iştirak edərkən öldürmək istəyib. Lakin binada çoxlu sayda qonağın olması və əməliyyatın uğursuzluqla nəticələnməsi riskinin yüksək olması səbəbindən bu planlardan imtina etmək qərara alınıb.
Qeyd olunur ki, Haniyənin iqamətgahına partlayıcı qurğular yerləşdirən iki İran kəşfiyyatçısı dərhal İranı tərk edib, lakin Tehrandakı mənbələri ilə əlaqə saxlayıb və buna görə də HƏMAS liderlərindən birinin növbəti gəlişindən xəbərdar olublar. Nəşr qeyd edib ki, bombalar evin üç otağına qoyulub. Bunun üçün “Mossad” İslam İnqilabı Keşikçiləri Korpusunun Ənsar əl-Mehdi bölməsindən yüksək vəzifəli məmurların təhlükəsizliyinin təmin edilməsinə cavabdeh olan agentləri işə götürüb.