“Həmkarım Arif Rəhimzadəyə obyejktiv insan kimi hörmətim olsa da, bu məsələdə tamamilə yanlış düşündüyünü söyləyə bilərəm. Müsahibədə səsləndiirdiyi fikirləri hətta zərərli hesab ediəm. Doğrudur, Arif müəllimin özü də təkzib verərək fikrinin təhrif olunduğunu söylədi, ancaq media vasitəsilə bu fkirlərin yayılması yaxşı hal sayıla bilməz. Halbuki, bir neçə gün öncə Rusiya deputatları ilə görüşdə Arif Rəhimzadə Azərbaycanın maraqlarını müdafiə edən və Rusiyanın addımlarını ittiham edən çox cəsarətli çıxış etmişdi. Yəni, Azərbaycan maraqlarını düşünən, dövlətçilik üçün fədakarlığa hazır olan insanlardan biri olduğuna qətiyyən şübhəm yoxdur. Bununla belə, fikrimcə, başqa ölkələrin media quruluşlarının təxribatçı suallarına daha diqqətlə yanaşması lazım idi”.

Bunu millət vəkili Fazil Mustafa həmkarı Arif Rəhimzadənin Rusiya mətbuatına müsahibəsində “biz türk deyilik” ifadəsi işlətməsi ilə bağlı yayılan xəbərlərə münasibət bildirərkən deyib.

F.Mustafa bildirib ki, şəxsən özü türk millətindən olmağı şərəf hesab edir: “Bu gün dilimizin adı siyasi anlamda Azərbaycan dilidir. Elmi cəhətdən Azərbaycan dili deyilən bir dil varmı? Bu dilin mənşəyi varmı? Xalq öz dilini doğru söyləməyəcək, onu dəyişdirəcək ki, bu kiminsə xoşuna gəlməyə bilər? Necə olur ki, Azərbaycanda talış, ləzgi, udin, kürd dillərinin mövcudluğundan danışılır, ancaq türk dilinin varlığından danışmaq qəbahət sayılır? Azərbaycanda türk dili yoxdur? Əslində isə Azərbaycan adlı bir dil yoxdur. Bu dilin elmi adı alternativsiz türk dilidir. Millətin adını azərbaycanlı deyirsən. Azərbaycanlı millət var? Bu addan bir vətəndaşlıq modeli olaraq istifadə olunur. Vətəndaşlıq modelindən başqa bu mənşə olaraq nə millətidir? Təbii ki, Azərbaycanda bütün millətlərdən var, amma dominantlıq təşkil edən türklərdir. Türklər də bütün milli azlıqların hüquqlarının qorunmasının təminatçısıdır. Həm də buna görə məsuliyyət daşıyırlar. Onda rus xalqı desin ki, biz yoxuq. Biz Rusiya xalqıyıq? Onda da bizim kimi özbəöz türk olan tatar özünə tatar desin, çeçen özünə çeçen desin, rus da desin ki, mən rusiyalıyam? Bəli, Azərbaycan dövləti var, hamımız Azərbaycan vətəndaşıyıq, hamımız qanun qarşısında bərabər hüquqa malikik. Amma bu dilin adı türk dilidir. Çoxluq adı türk dili olduğu üçün azlıq da ümumi ünsiyyət vasitəsi kimi bu dili qəbul etməlidr. Necə olur ki, Anadolu türkü türk sözünü özünə şamil edir, biz türk ola-ola bunu özmüzə şamil etmirik? Sadəcə, bu tanıtımı biz siyasi məqsəd kimi istifadə etməməliyik. Biz onsuz da Azərbaycan vətəndaşı kimi bərabər hüquqa malikik. Hansısa azsaylı xalqların narazı qalmaması üçün, yaxud da Rusiyanın xoşuna gəlmək üçün öz millətimizi danmalıyıqmı? Əksinə, bunu açıq söyləyərək onlarla daha çox səmimi oluruq. Açıq söyləməyəndə onlar özlərini bizim ümumi ad altında daha çox ərimiş hiss edirlər və qeyri- səmimilik yaranır. Ermənilər bizi olduğu kimi - türk çağırırlar, bizdə isə bir çoxları nədənsə öz gerçək adımızı söyləməkdən utanır”.

Cebhe.info