Hakimiyyətə gəldiyi ilk gündən, xüsusilə körfəz ölkələrini təhdid və şantaj edərək silah satışını artıran Donald Tramp satışı daha da yüksəltmək üçün yollar axtarır.

Publika.az xəbər verir ki, bu haqda “Röyters” agentliyi yazıb.

Məlumata görə, silah satışını milyardlarla dollar artırmaq üçün Trampın əmri ilə amerikalı diplomatlar silah tacirliyi vəzifəsini yerinə yetirəcəklər.

“Röyters”ə danışan amerikalı səlahiyyətlilərə görə, prezident Donald Tramp fevral ayında “Amerika malını al və aldır” siyasəti çərçivəsində bəyanatla çıxış edəcək. Bəyanatla xarici ölkələrə silah və sursat satışı qaydalarını ləğv etmək üçün bütün hökumət səviyyəsində tam hüquqlu səfərbərlik elan ediləcək.

Xəbərə görə, ABŞ Tramp döyüş təyyarələrindən pilotsuz uçuş aparatları, hərbi gəmilərdən artilleriya sistemlərinə qədər müxtəlif növlü silahlar satmaqla 2016-cı il seçki kampaniyasında verdiyi vədlərdən birini yerinə yetirmək niyyətindədir. Tramp ölkə xaricinə daha çox mal və xidmət sataraq son 6 ilin rekordu olan 50 milyard dollarlıq mənfi ticarət balansını azaltmağı planlaşdırır. ABŞ prezidenti həmçinin Çin və Rusiya silah şirkətləri ilə rəqabət aparan Amerika şirkətlərinin təzyiqi altındadır.

ABŞ-ın xarici ölkələrdəki hərbi və ticarət nümayəndələrinin səfərbər edilməsi ilə yanaşı, Beynəlxalq Silah Ticarəti Qaydaları (İTAR) da nəzərdən keçiriləcək. 1976-cı ildən etibarən federal hökumətin silah ixracı siyasətini müəyyən edən İTAR 30 ildir dəyişməyib. Qaydalara edilən dəyişikliyə əsasən, NATO üzvü olmayan və dost ölkələr üçün də silah satışı sadələşdiriləcək.

Ancaq Ağ Evin silah satışı siyasəti özü ilə bir sıra risklər gətirəcək. Silah satışının artması ilə Yaxın Şərq və Asiyada silahlanma yarışının aktivləşəcəyi, həmçinin yeni münaqişə ocaqlarının yaranacağı proqnozlaşdırılır. Bu silahların terror təşkilatlarının əlinə keçmə ehtimalını da nəzərə alsaq, dünya terror hücumları artacaq.

Qeyd edək ki, dünyanın ən böyük silah satıcısı olan ABŞ-ın 5 ən böyük silah şirkəti – “Lockheed”, “Boeing”, “Raytheon Co”, “General Dynamics Corp” və “Northrop Grumman”ın səhmlərinin dəyəri son 5 ildə 3 dəfədən çox artıb. ABŞ 2016-ci ildə 31 milyard dollara çatan silah satışını 2017-ci ildə 42 milyard dollara yüksəldib.

Bu il yanvarın 20-də Ağ Evin kreslosuna oturan Donald Tramp noyabr ayına qədər təxminən 49 milyard dollarlıq silah satışına imza atıb. Trampın rəhbərliyi bununla da son illərin ən yüksək satış göstəricilərini əldə edib. Keçən ilki 33 milyard dollarlıq silah alverindən sonra bu il bu rəqəmin 50 milyard dollara çatması, Tramp adminstrasiyasının "silah anlaşmaları mövzusunda öncəki rəhbərliklərdən daha istəkli" olduğu kimi dəyərləndirilir.

Digər tərəfdən, əvvəlki ABŞ prezidenti Barak Obama Konqres qeydlərinə görə 8 illik prezidentliyi müddətində təxminən 277, illik ortalama olaraq da 35 milyard dollar silah satışı həyata keçirib. Ayrıca olaraq, Obama 8 illik prezidentlik dövründə ABŞ-ın 2-ci Dünya Müharibəsindən bu yana ən çox silah satışı həyata keçirən prezidenti olaraq tarixə düşmüşdü.