Belarus Dövlət Təhlükəsizlik Komitəsi keçirdiyi xüsusi əməliyyat nəticəsində hökumət orqanları nümayəndələrinin telefon danışıqlarını dinləyən cinayətkar dəstənin qanunsuz fəaliyyətini ifşa edib.

“Qafqazinfo” xəbər verir ki, bu barədə Belarus KQB-si məlumat yayıb.

Əməliyyat nəticəsində cinayətkar dəstənin təşkilatçıları yaxalanıblar. Səksəndən çox axtarış həyata keçirilib və qeyri-qanuni xidmətin 500-ə yaxın sifarişçisi müəyyən edilib. Saxlanılanlar haqda həbs qətimkan tədbiri seçilib.

Xüsusi-xidmət orqanının məlumatına görə, qanunsuz fəaliyyət 2 mindən çox Belarus vətəndaşına qarşı aparılıb.

Üç il ərzində cinayətkar qrupun üzvləri otaqların, telefon danışıqlarının dinlənilməsi, elektron poçtun, Skype, Viber, WhatsApp sosial şəbəkə akkauntlarının dağıdılması kimi qanunsuz fəaliyyətlər həyata keçiriblər.