ABŞ-nin Tennessi ştatında bir həftədən çox müddət azadlıqda gəzən və sosial şəbəkələrin ulduzuna çevrilən zebra Ed yaxalanaraq sahiblərinə qaytarılıb.

CNN- ninməlumata görə, bu barədə Ruzerford dairəsinin şerif idarəsindən xəbər verilib.

Bildirilir ki, Ed Tennessinin mərkəzində bir otlaqda aşkarlanıb. Hadisəyə cəlb edilən hava qüvvələri onun tutulmasına yardım edib.

Sosial şəbəkələrdə onun helikopterlə daşınmasının görüntüləri yayılıb.

Qeyd edək ki, Ed mayın 30-da alınıb, lakin bir gün sonra evdən qaçıb. Heyvanın ştatlararası magistralda qaçması nəticəsində yol polisi trafiki müvəqqəti olaraq dayandırmalı olub. Lakin Ed polis kordonunu keçərək meşəlik əraziyə qaçıb və bir neçə gün ərzində müxtəlif yerlərdə görünüb.

Sosial şəbəkələrdə müxtəlif situasiyalarda çəkilmiş görüntüləri paylaşılan Ed sürətlə populyarlaşıb. Bəzi istifadəçilər onun vafli yediyini və yol kənarında insanlarla "ünsiyyət qurduğunu" göstərən zarafatlı montajlar yayıblar.