"ABB-Moskva"nın Sankt-Peterburqdakı filialı fəaliyyətini əvvəlki rejimdə davam etdirir. Bunu Trend-ə filialın direktoru Yaşar Səfərov deyib.

O bildirib: "Hüquq-mühafizə orqanları əməkdaşlarının bankın filialına gəəlməsi müştərilərimizdən biri ilə bağlı olub. Bunun işçilərimizlə heç bir əlaqəsi yoxdur".

Bundan əvvəl Azərbaycan Beynəlxalq Bankının (ABB) mətbuat xidmətinin rəhbəri Yadigar Cəfərli Trend-ə bildirmişdi ki, Sankt-Peterburq polisi bankın keçmiş müştərilərindən birinin arxiv sənədlərini əldə etmək üçün "ABB-Moskva"nın Sankt-Peterburqdakı filialında olub. Onun sözlərinə görə, bankın Peterburq filialı hazırda işini normal rejimdə davam etdirir və fəaliyyətində hər hansı problem müşahidə edilmir.

Rusiya mətbuatının yazdığına görə, bu gün Sankt-Peterburqda "ABB-Moskva" bankının filialının ofisində axtarış aparılıb. Cinayət işi çərçivəsində aparılan bu tədbirlər pulların xaricə qanunsuz çıxarılması ilə bağlıdır.