Bir neçə gündür paytaxtdakı apteklərdə aşkar olunan ciddi nöqsanlarla bağlı qafqaznews.az saytı maraqlı reportajlar dərc edir. Dünən əməkdaşlarımız Bakı sakininin redaksiyamıza müraciəti əsasında Yasamal rayonu, H.Zərdabi küçəsi, 89 ünvanda yerləşən “Avis” tibbi market aptektində və eyni ünvanda qonşuluqda yerləşən “24 saat” aptekində olublar. Əməkdaşlarımız vətəndaşın redaksiyaya təqdim etdiyi videoçəkilişin əsasında həmin apteklərin satıcılarına bir neçə sualla müraciət ediblər.
Qısa məlumat üçün bildirək ki, şikayətçi vətəndaş əvvəlcə “Avis” tibbi marketə baş çəkərək Condrotide adlı dərmanın qiymətinin 209 manat olduğunu öyrənib. Sonra isə qonşuluqda yerləşən “24 saat” aptekindən həmin dərmanın qiymətinin 150 manat olduğunu öyrənib. Alıcı haqlı olaraq soruşur ki, eyni dərmanın qiymətləri arasındakı 59 manat fərqi necə izah etmək olar..? Biz də öz növbəmizdə apteklərin satıcılarına həmin məsələ ilə bağlı sualla müraciət etdik. “Avis” tibbi marketdən bizə bildirdilər ki, alıcının adını çəkdiyi dərman 1057 növ dərmanın siyahısında olmadığı üçün, bu dərmanın vahid qiyməti ola bilməz. “24 saat” aptekinin işçiləri isə bildirdilər ki, Condrotide dərmanının vahid qiyməti bu ilin dekabr ayında tətbiq olunacaq siyahıda olacaq. Bizim üçün də çox maraqlıdır ki, eyni dərmanın qiyməti arasında olan fərq 59 manat necə ola bilər..