Akif Çovdarov. Bu ad çəkiləndə ölkə insanın təsəvvüründə dərhal “Qanlı general” deyə bir şəxs canlanır. MTN adlı nazirliyinin ləğv olunmasına səbəb olan bu qurumun keçmiş rəhbərliyində olan general Çovdarov iş adamlarının, məmurların qənimi kimi xarakterizə edilir. Cinayət Məcəlləsinin bir çox maddələri ilə ittiham olunan MTN generalı Akif Çovdarov hazırda məhkəmə qarşısındadır.
Azərbaycan 24 xəbər verir ki, Akif Çovdarovun oğlu Ruslan Çovdarov ilk dəfə mediaya müsahibə verib.

Qeyd edək ki, müsahibə suallara yazılan cavablar formasında hazırlandığından polemika səviyyəsində alınmayıb. Bununla belə hesab edirik ki, Azərbaycan vətəndaşının soruşmaq istədiklərini generalın oğlundan öyrənmişik.

Ruslan bəy, nə zamansa ağlınıza gələrdimi, Eldar Mahmudovun “vurulması” ilə atanın ölkədə böyük rezonansa səbəb olacaq həbsi baş verəcək?

MTN nin ləğv edilməsi və Eldar Mahmudovun vəzifəsindən azad olunması birbaşa dövlət başçısı Cənab Prezidentimiz İlham Əliyevin sərəncamı ilə həyata keçirilmişdir. Yəni ki, bu, cənab Prezidentin səlahiyyətinə aid olan bir işdir. Nəinki mən, hətta heç bir şəxs Cənab Prezidentimizin qərarını müzakirə edə bilməz.

Eldar Mahmudov vəzifəsindən azad edildikdən sonra Akif Çovdarovun bir ay öz işində qalması da onu göstərdi ki, yuxarı dairələrin ona qarşı heç bir qərəzi yoxdur. İndi siz soruşursuz ki ağlınıza gələrdimi, təbii ki hec bir zaman ağlimiza belə gəlməzdi ki, bele bir hadisə baş verə bilər. Lakin bir ay müddətində atama qarşı başlayan “qara piar” kampaniyası , ictimaiyyətdə və yuxarı dairələr qarşısında “qanqster” obrazının yaradılması onu gostərdi ki , bu işdə marağı olan bəzi qüvvələr var.
O ki, qaldı atamın həbsinin rezonansa səbəb olması, bunu həmin qüvvələrin sifarişi, bəzi media nümayəndələrinin şəxsi maraqı və düşmənçilik məqsədləri ilə yazıldığını düşünürəm.
Atam 40 il dövlətimizə xidmət edib, Daxili İşlər Nazirliyində məsul vəzifələrdə çalışıb, polkovnik rütbəsinə yüksəlmişdir. 1990 cı illərdə Qarabağ müharibəsinin iştirakçısı olub, müharibə veretanıdır. 2005 ci ildən Milli Təhlükəsizlik Nazirliyində işə başlayıb. Cənab prezidentimiz tərəfindən dövlət qarşısında göstərdiyi xidmətlərə görə dəfələrlə medal və ordenlərlə təltif edilmişdir. Azərbaycan Dövlətinə, cənab Prezident İlham Əliyevə və öz naziri Eldar Mahmudova şərəflə qulluq edib, ona gostərilən etimadı doğruldub, sadiq olub və olacaq. Mənim buna heç şübhəm yoxdur və bununla qürur duyuram.

– MTN-nin dağılmasından 1 il keçsə də bütün cəmiyyət hələ də Akif Çovdarovun cinayətlərindən danışır. Atanın “işgəncələr kralı “ olmasından xəbərdar idinmi? Onun iş adamlarını , məmurları qanunsuz həbs edib pullarını , əmlaklarını ələ keçirməsindən bir oğul kimi xəbərin olubmu?

– Açığı desəm , bütün cəmiyyət əvəzinə danışmaq düzgün deyil. Yuxarıda qeyd etdiyim kimi , cəmiyyət yox müəyyən bir qrup şəxs və media həmin “cinayətlərdən” danışır. Mediada hallanan “İşgəncələr kralı “ , “Qanlı General” , “Qanqster General” kimi ifadələri əsassız ittiham və qarayaxma piarı kimi qiymətləndirmək olar. Axı, məhkəmə yekunlaşmamış və məhkəmənin hökmu çıxmamış kiməsə böhtan atmaq özü bir cinayətdir. Məsələn, Siz Pərviz Həşimlidən soruşuram: Deyin görək, Akif Çovdarov şəxsən sizə nə pislik edib? Bəlkə sizi o həbs edib , döyub , söyub və sizə qarşi hər hansı bir qanunsuzluq edib? Təbii ki yox . Amma siz Pərviz Həşimli baş redaktoru olduğunuz saytda atamı “vətən xaini” belə adlandırmısınız. Azad jurnalist o demek deyil ki , hər ağlına gələni yazmalıdır. MTN işində 21 nəfər səxs həbs edilib, gorəsən niyə, ictimaiyyətin gozündə məhs Çovdarov şişirdildi ?! Bu sifariş deyil bəs nədir ?


Bu gün hamıya bəllidirki, Akif Çovdarov işi üzrə ittiham aktı bütün media nümayəndələrinin , saytların əlinə hansısa yolla keçib . Baxın görün bu cinayət işində adı keçən “zərərçəkmişlər” kimlərdir. Dələduzlar, barələrində cinayyət işi olanlar, həbsdə olanlar, narkotik vasitə istifadəçiləri və satanları və sair adamlar zərərçəkən kimi tanınır. Yaranmış vəziyyətdən istifadə edənlər var. Bizdə məşhur el məsəlinin- “yıxılana balta çalınır” durumunun şahidiyik.

Cinayət işində adı zərərçəkmiş kimi taninan , Biləcəri bələdiyyəsinin keçmiş sədri İlham Məhəmməd oglu Xəlilovdur. Bu şəxs Atamin yaxın dostu Adil Yaqubov vasitəsi ilə tanış olmuşlar və o vaxtdan dostluq munasibətləri olub , dəfələrlə bizim evdə olan məclislərdə iştirak edib. Lakin atam həbs olunduqdan 4-5 ay sonra İlham Adili Yaqubovun evinə gəlib ona yalvararaq deyib ki, onun küllü miqdarda borcu var, qaytarmasa onu öldürəcəklər. Adil Yaqubova deyib ki, onunla birlikdə Akif Çovdarovun üzünə dursun, ondan şər yolu ilə pul alıb borclarını qaytarsın, onsuzda bu adamın başına iş gəlib və axiri nə olacağı bilinmir. Adil Yaqubov bu təklifi rədd edib, olmayan məsələni yalandan deyə bilməyəcəyini bildirərək, evindən qovub. Bundan sonra İlham Xəlilov prokurorluğa ərizə ilə müraciət edib və araşdırılmadam zərərçəkmiş kimi tanınmışdır. Ilham Xəlilov ifadəsində Binəqədi Bələdiyyəsinin sədri Elman adlı şəxsi də qeyd edərək bildirmişdir ki , guya, Akif Çovdarov ondanda 100,000 manat pul almış. Lakin Elman adlı şəxs istintaqda ifadə verərkən, nə Akif Çovdarovu şəxsən tanıdığını nə də ona hər hansı pul verdiyini demiş, pulu ondan İlham Xəlilovun MTN adından istifadə edərək tələb etdiyini göstərmişdir. Bu şəxsin nə qədər dələduz olduğunu biz indi öyrəndik. Deyilən məlumatlara görə, Baki ətrafında ən bahalı torpaqları qanunsuz, hətta bir pay torpağı bir neçə şəxsə satdığı üçün, İcra Hakimiyyətinə daxil olan şikayətlər əsasında Bələdiyyə sədrliyi və üzvlyündən qovulmuşdur. Hətta bu səxs barəsində cinayət işi olub. Indi bu səxsdən soruşan yoxdur ki , bələdiyyə sədri ola ola ABŞ-ın Los Angeles şəhərində, Parisdə və İstanbulda olan mülkləri hansı vəsait hesabına almışdır?

Və yaxud, digər bir epizoddan danışaq. Saytların qələmə verdiyi “Vosmoy Bazarı” məsələsinə toxunaq. İlk öncə ondan başlayaq ki, “Vosmoy Bazarı” deyilən yerdə 5 ayri-ayri kiçik bazarlar var. Hər biri də başqa başqa adamlara məxsusdur. Bu bazara bizim heç bir aidiyyatımız olmayıb, bu bazarın 50 % kürəkənimiz , 1990- cı ildən Rusiya Federasiyasında yaşayan iş adamı Rövşən Qasımova məxsusdur. Mən bu işlərdən xəbərsiz olmuşam , lakin sonradan mənə bəlli olub ki , bazar Cingiz Əsadov adlı şəxsdən halaliq yolu ilə , dəyəri tam şəkildə ödənilməklə alqı satqı edilib. Bu işdə adı keçən dırnaq arası “zərəçəkmişlər” , Səfərov qardaşları isə hamıya bəllidir ki reketçiliklə məşğul olaraq , keçmiş sahibi Çingiz Əsədovdan bazarı zor gücləri, hədə -qorxu , onun fiziki qüsurundan( 1 ci dərəcəli əlildir-Ruslan Çovdarov) istifadə edərək , qardaşını oğurlayıb və bundan sonra bazarı ələ keçirmişdilər. Hətta sonralar bazar Cingiz Əsədova geri qaytarıldıqda Səfərov qardaşlarına da halalliq üçün 300.000 ABŞ dolları verilmiş və banka olan kredileri tam şəkildə ödənilmişdir.

– Atanın həbsindən sonra ailənizə məxsus villalar, daşınmaz əmlaklar ortaya çıxdı. Bunları general maaşı ilə əldə emək mümkündürmü ?

– Villalar dedikdə , bizim ailənin bir evi , bir bağ evi və bir də dövlət tərəfindən atama verilən mənzilimiz var. Atamı tanıyanlar bilir ki, o, 1996 cı ildən 2004 cü ilə qədər Russiyada taxta – şalban istehsalı və satışı ilə məşğul olan ən böyük iş adamlarından biri olub. Bu sizin verdiyiniz (general maaşi ilə alına bilərmi ) sualına cavabdır. Qalanları qohum əqraba, əmi-dayıya məxsus evlərin , mülklərin atamin adına çıxılması nə dərəcədə düzgündür? Sizin məntiqinizlə nəsildə , ailədə bir vəzifəli şəxs varsa, deməli hamı kirayədə qalmalı , heç bir sahibkarlıq fəaliyyəti ilə məşğul olmamali və hamı generalın əmək haqqısı ilə dolanmalidırlar?

– Atanın adı mərhum jurnalist Elmar Hüseynovun qətlində, jurnalist Aqil Xəlilin döyülməsində və sonradan bıçaqlanmasında da çəkilib…

– Mənim atamın adını çəkdiyiniz bu şəxslərlə problemi olmayıb. Mənim atam Elmar Hüseynovu niyə öldürtməli idi. Bu iddialar cəfəngiyyatdır. Aqil Xəlil olayında mən xaricdə təhsil alırdım. Zeytunluqda nəsə bir olay olmuşdu. Amma atama yaraşmaz ki, jurnalisti bıçaqlatsın. Bəlkə atamı zərbə altına qoymaq istəyən kimlərsə bunu təşkil edib. Nə bilmək olar.

– İctimaiyyət arasında olan şəxs kimi bunu deyirəm: Akif Çovdarovun adı çəkiləndə insanlar anidən təlaş keçirir, sanki, qorxunc bir təhlükə görür . Atan evdə necə insan olub, onun qəddar qəlbli olduğunu övladı kimi hiss etmisinizmi?

– Bu obrazı kim yaradıb? Əvvəlcə bu suala cavab verək. İnsanlarda qorxunu sizin rəhbəri olduğunuz sayt daxil olmaqla, ölkə KİV-ləri yaradıb. Təəssüf ki, bizdə “yıxılanı baltalayırlar”.
Akif Çovdarovu taniyanlar bilir ki, necə ürəyə sahib olub, qapisina kömək məqsədi ilə gələni heç vaxt geri qaytarmayıb. Vəzifə çərçivəsi daxilində Gürcüstan rəhbərliyinə xahiş etmiş, Marneuli rayonunun kəndlərinə asfalt yol çəkdirmiş,məktəblər təmir etdirmiş, hər bir evə qaz çəkdirmiş və fasiləsiz verilməsinə nail olmuşdur.

Atam gözəl ailə başçısıdır, ailə sevəndir , bunu tanıyan hər bir şəxs təsdiq edə bilər. Ailədə heç vaxt dövlətin işini müzakirə etməyi və işi haqqında danışmağı sevməz. Cox ciddi , düzgünlüyü sevən və tələb edən adamdır.

Yeri gəlmişkən, atanın həbsi ailənizə , doğmalarınıza daha nələrə başa gəldi? Bildiyimiz qədər ailənizin əmlaklarına həbs qoyulub, həmçinin, ölkədən çıxışınıza qadağa var.

Sizə bildirmək istəyirəm ki , nəinki, bizim ailə və nəslin nümayəndələri , hətta 10- cu dərəcəli qohumlarımız istər dövlət, istərsə də özəl sektordakı işlərindən kənarlaşdırılıblar. Mən əminəm ki , cənab Prezidentimizdən xəbərsiz, atamla düşmənçilik edən müəyyən quvvələr bu repressiv hərəkətləri həyata keçirmişdilər. Özümüzün, digər doğmalarımızın əmlaklarına həsb qoyulub. Ailəmizin ölkədən çıxışına məhdudiyyət qoyulub. Bizim qohumlarımızın əksəriyyəti Gürcüstanda yaşayırlar və xeyir-şər işlərində iştirak etmək bizim borcumuzdur. Bu yaxınlarda bir qohumumuz dünyasını dəyişdi və biz indiki vəziyyətə görə orada iştirak edə bilmədik.

Akif Çovdarov ittiham edilir ki , camaata mənəvi ziyan vurub. Indi siz deyin, bu, bizə vurulan mənəvi ziyan deyilmi? Atam Akif Çovdarov 40 illik əmək fəaliyyətinin sonunda pensiya belə ala bilməməsi mənəvi ziyan deyilmi? Bildiyiniz kimi atam 10 gündən çoxdur ki aclıq aksiyasındadır. Buna heç bir reaksiya verilməməsi hüquqlarının pozulması deyilmi?

Məhkəmənin sonundan nə gözləyirsiz ? Atanla görüşlərində özünü peşman hesab edirmi?
Atam ifadələrində də qeyd edib ki, onun üzərinə qoyduqları heç bir ittihamla razılaşmır. Etdiyi hərəkətlər və həbs etdiyi insanlarla bağlı tədbirləri qanun cərcivəsində həyata keçirilmişdir.
Bizim qüdrətli Azərbaycan Dövlətimizin başında cənab İlham Əliyev kimi ədalətli prezidentimiz , ədalətli məhkəməmiz olduğu üçün inanıram ki, məhkəmə ədalətli qərar çıxaracaq.
Və sonda ümid edirəm ki, mənim fikirlərimi təhrif etmədən olduğu kimi ictimaiyyətə təqdim edəcəksiniz.(gununsesi)