Özüm hərbi xidmətdə olmamışam. Bunun səbəbi səhhətimlə bağlı olub. Amma çox istəmişəm ki, hərbi xidmətdə olum.
Bunu Milli.Az-a açıqlamasında Milli Məclisin Hüquq siyasəti və dövlət quruculuğu komitəsinin sədr müavini Rövşən Rzayev deyib.

Millət vəkilinin sözlərinə görə, o, hətta bu məqsədlə hərbi tibbi komissiyanın üzvlərini aldatmağa da çalışıb: "O vaxt sovet dövrü idi, çalışdım ki, hərbi komissarlığın tibb komissiyasının diqqətindən birtəhər yayınıb keçim. Amma həkimlər diqqət yetirdilər və məndə olan problemi üzə çıxartdılar. Mən də hərbi xidmətə gedə bilmədim".

R.Rzayevin fikrincə, Vətənə xidmət bir şərəf məsələsidir: "Özüm hərbi xidmətdə ola bilməsəm də, çox istərdim ki, hər bir Azərbaycan oğlu hərbi xidməti özünə borc bilib, bunu böyük şərəf hissi ilə qəbul eləsin və gedib Vətənə qulluq eləsin. Təəssüf ki, bəzilərində bununla bağlı bəzi problemlər var. Hərbidə yox, hərbiyə getmək istəməkdə. Maşallah, Azərbaycan Silahlı Qüvvələri çox böyük inkişaf yolu keçib. Mən çox hərbi hissələrdə olmuşam. Əvvəlki illərlə müqayisədə müsbət dəyişikliklər həddən artıq çoxdur, gözəçarpacaq dərəcədədir".