Ukrayna gələcəkdə özünümüdafiə, o cümlədən Rusiya ərazisindəki hərbi hədəflərə mümkün hücumlar üçün alman silahlarından istifadə edə biləcək.
Yeniavaz.com “Tagesschau” portalına istinadla xəbər verir ki, bunu Almaniyanın xarici işlər naziri Annalena Berbok deyib.
O vurğulayıb ki, Ukrayna özünü müdafiə etməzdən əvvəl öz ərazisinə hücumu gözləmək məcburiyyətində deyil.
“Ukraynanın özünümüdafiə hüququ o demək deyil ki, raket özünü müdafiə etməyə icazə verilməzdən əvvəl sərhədi keçməli və ya Xarkov kimi şəhəri vurmalıdır. Hətta ən yaxşı hava hücumundan müdafiə sistemləri belə həmişə bunun qarşısını ala bilmir”, - nazir qeyd edib.
O, gələcək hücumların qarşısını almaq üçün qabaqlayıcı tədbirlərin vacibliyini vurğulayaraq, buraxılış məntəqələrinin məhv edilməsinin zəruri tədbir ola biləcəyini qeyd edib.