Rusiya Prezidentinin xüsusi nümayəndəsi Kirill Dmitriyev Ağ Evdəki görüşdən sonra Ukrayna mövzusunda gözlənilməz bəyanatla çıxış edib.

“AzPolitika” xəbər verir ki, “Fox News”-a müsahibəsində Dmitriyev Ukraynaya təhlükəsizlik zəmanətinin verilməsinin mümkünlüyündən danışıb. O deyib ki, Ukrayna üçün bəzi təhlükəsizlik təminatları “məqbul sayıla bilər”.

Dmitriyev Ukraynanın Rusiyanın enerji obyektlərinə hücum etdiyini, əvvəl əldə edilmiş razılaşmanı pozduğunu iddia edib. Lakin buna baxmayaraq, Ağ Evdə keçirdiyi danışıqların “müsbət notla” başa çatdığını vurğulayıb.

Onun sözlərinə görə, Kreml Kiyevin təhlükəsizliyinin təmin edilməsi variantlarını müzakirə etməyə hazırdır: "Bu və ya digər formada müəyyən təhlükəsizlik təminatları məqbul ola bilər".

Lakin bu zəmanətlərin nədən ibarət ola biləcəyini açıqlamayıb. Eyni zamanda o, Ukraynanın NATO-ya daxil olmasını “tamamilə qeyri-mümkün” adlandırıb.

”Politico” nəşri isə bu barədə yazır ki, Dmitriyevin sözləri Kremlin ənənəvi xəttindən fərqlənir. Çünki indiyə kimi Vladimir Putin sülhün yalnız Ukraynanın “demilitarizasiyası” və Rusiyanın digər tələblərinin yerinə yetirilməsi şərtilə mümkün olduğunu təkid edib. Xarici İşlər naziri Sergey Lavrov isə daha da kəskin mövqe nümayiş etdirib. Həmçinin o, Avropa sülhməramlılarının Ukraynada mövcudluğunu istisna edərək, bunu “qəti şəkildə qəbuledilməz” adlandırıb.

Bütün bunlarla yanaşı, Ukraynanın da mövqeyi hələ ki, dəyişməz qalır. Prezident Volodimir Zelenski təkid edir ki, Rusiyanın yeni hücumunun qarşısını almağın və Kiyevə ciddi zəmanət verməyin yeganə etibarlı yolu NATO-ya üzvlük və Ukrayna ərazisinə Amerika və Avropa sülhməramlılarının yerləşdirilməsidir. Lakin ABŞ administrasiyası və Kremlin məsələyə baxışı Kiyevinkindən ciddi şəkildə fərqlənir…

“AzPolitika.info”