Almaniyalı Avropa Parlamenti deputatı Yoaxim Ştrayt Kanadanın Avropa İttifaqına üzv olması ideyasını müdafiə edir. Onun fikrincə, Kanada “azadlıq arzusu” və “Avropaya daha yaxın Amerika” obrazını təmsil edir.
Euronews xəbər verir ki, mövzu, Kanadanın yeni baş naziri Mark Karneynin ilk xarici səfərini mart ayında ənənəyə zidd olaraq Vaşinqtona deyil, Avropaya etməsindən sonra aktuallaşıb. Karney Kanadanı “Avropaya aid olmayan ölkələr arasında ən Avropa ölkəsi” adlandırıb.
Ştrayt bu bəyanatdan və sorğularda kanadalıların 46%-nin Aİ-yə üzvlüyə müsbət yanaşmasından ruhlanaraq məsələni yenidən gündəmə gətirib.
Aİ Müqaviləsinin 49-cu maddəsi yalnız "Avropa dövlətlərinin" üzvlük üçün müraciət edə biləcəyini bildirsə də, Ştrayt bu anlayışın geniş izah oluna biləcəyini düşünür. O, Kipr və Aİ-nin dənizaşırı ərazilərini misal göstərir.