Almaniyanın ən böyük banklarından biri olan “Commerzbank” xəbərdarlıq edib ki, ABŞ-nin bu həftə açıqlanacaq məlumatları dolların gücünü qorumaqla avronu ucuzlaşdıracaq. Bank ucuzlaşma nəticəsində bir avronun bir dollara qədər düşəcəyini gözləyir.

TEREF Sfera.az-a istinadən xəbər verir ki, hazırda ABŞ iqtisadiyyatı digər inkişaf etmiş ölkələrlə müqayisədə daha dayanıqlıdır. Buna görə də son aylarda dolların avro ilə müqayisədə bahalaşması müşahidə edilir.

Ötən cümə axşamı avronun dollara nəzərən məzənnəsi son iki ilin ən aşağı səviyyəsi olan 1,0227 həddinə qədər düşmüşdü. Hazırda məzənnə 1,0341-dir. Bu həftə ABŞ-də dayanıqlı mal sifarişləri, ISM xidmətləri indeksi, JOLTS işə götürmə rəqəmləri, ADP özəl məşğulluq göstəriciləri açıqlanacaq.

“Commerzbank” hesab edir ki, bu göstəricilər pozitiv olarsa, əvəzində Avropa İttifaqı ölkələrində inflyasiya bir qədər də güclənərsə, avro dollara nəzərən daha da ucuzlaşacaq.

Alman bankı növbəti ucuzlaşmanın nəticəsində bir avronun bir dollar olmasının gözlənildiyini bildirib.