Bu ilin I rübündə Azərbaycandakı mehmanxana (hotel) və mehmanxana tipli obyektlərin gəlirləri ötən ilin eyni dövrü ilə müqayisədə 12,1 % artaraq 125,1 milyon manat olub.

İndex.az Dövlət Statistika Komitəsinə istinadən xəbər verir ki, bunun 58,6 %-i nömrələrin (otaqların) təqdim olunması üzrə xidmətlərdən, 28 %-i ictimai iaşə xidmətlərindən, 3,1 %-i müalicə və sağlamlıq xidmətlərindən, 10,3 %-i isə digər xidmətlərin göstərilməsindən əldə edilib.

Yanvar-mart aylarında mehmanxana (hotel) və mehmanxana tipli obyektlərin birdəfəlik tutumundan istifadə səviyyəsi ölkə üzrə 19,3 % olub (1 il bundan əvvəl 17,8 %). Bu göstərici Şabranda 68,2 %, Qusarda 43,5 %, Naftalanda 31,2 %, Bakıda 28 %, Sabirabadda 27,2 %, Qəbələdə 24,5 %, Bərdədə 19,7 %, Ağdamda 19,2 %, Şamaxıda 16,4 %, Ağstafada 16,3 %, Beyləqanda 15,7 %, Lənkəranda 15,6 %, Qubada 15,3 %, digər şəhər və rayonlarda isə 15,3 %-dən aşağı olub.